ТР-ниң Дээди Хуралының даргазы Кан-оол Даваа парламентиниң мурнундан күш-ажылдың хоочуну, көскү хөй-ниитижи Долчун Лопсан-Шыыраповна Ондарның мугур 90 харлааны-биле байыр чедирген.
Долчун Ондар бичии тургаш, Ада-чурттуң Улуг дайынының үезинде, фронтучуларга чылыг хеп даарап турган. 18 харлыында көдээ ажыл-агый чөвүлелиниң депутады кылдыр соңгуттурган. Үр үе дургузунда ол Тываның херээженнер чөвүлелин, күрүнениң садыг болгаш хереглел кооперация ажылдакчыларының профэвилелин баштап турган.
– Хөй чылдар дургузунда ак сеткилдиг ажылыңар, Тываның сайзыралынче үнелеттинмес үлүг-хууңар дээш силерге өөрүп четтиргенивистиң болгаш ханы хүндүткеливистиң сөстерин илередип тур бис. Барык бүдүн чуртталгаңарда төрээн республикаңарга, чаңгыс чер-чурттугларыңарга бараан болуп чораан силер.
Силер ышкаш кайгамчыктыг кижилер бистиң чанывыста чурттап, бистиң-биле амыдыралдың болгаш күш-ажылдың дуржулгазы-биле үлежип чорууру дээш чоргаарланып, ону үнелеп турар бис. Силерниң эрткен орууңар сагыжывыска чүгле хүндүткел киирер-дир – деп, Кан-оол Даваа демдеглээн.
Ужуражылганың сөөлүнде ТР-ниң Дээди Хуралының даргазы Долчун Лопсан-Шыыраповнага быжыг кадыкшылды, узун назылаарын болгаш аас-кежикти күзээн.
