Дөң-Терезин суурда ангар хевирниң чаа спорт залын байырлыг байдалга ажытканын Барыын-Хемчиктиң Олимпийжи курлавыр спорт школазы дыңнаткан.
Тываның спорт сайыды Владимир Түлүш тус черниң чурттакчыларынга байыр чедирип, кызыл кожаа кезер езулалга киришкен.
Ам Дөң-Терезинниң чурттакчыларында агаар-бойдустан хамаарылга чокка бүдүн чыл дургузунда спорт-биле өңнүктежир амгы үениң шөлү бар. Зал чоокку үеде хол биле бут бөмбүү, баскетбол болгаш спорттуң өске-даа хевирлеринге ынактарга сорунзалыг төп, ол ышкаш школа болгаш кожуун маргылдааларын эрттирер чер апаар.
«Тыва Республикада күш-культура болгаш спорттуң сайзыралы» күрүне программазының чорудуу-биле Бии-Хем кожууннуң Өөкте, Каа-Хем кожууннуң Кундустугда, Чөөн-Хемчик кожууннуң Шемиде, Бай-Тайга кожууннуң Хемчикте ангар хевирниң спорт залдарын тудуп турар. Чаа залдар тус черниң чурттакчыларынга спортту чедингир болдурар.
