Бии-Хем кожууннуң Өөк сумузунуң девискээринде кыштаглаашкын чогумчалыг эртип турарын сумунуң чагырга даргазының хүлээлгезин күүседип турар Чингис Оттукай дыңнаткан.
– Сумуда 26 малчын кыштаг бар. Ооң иштинде «Кыштаг» төлевилелиниң киржикчилериниң саны үш, «Чаа сорук» төлевилелде бир өг-бүле. Көдээ ишчилер сиген-ширбиилди четчир кылдыр белеткеп алган болгаш кыштаглаашкын онча-менди эртип турар. Мал-маганының деңгели эки. Чамдык аалдарда мал оолдаашкыны эгелей берген.
Чоокта чаа Вячеслав Монгуштуң кыштаанга четтивис. Көдээ ишчи бода, шээр болгаш чылгы мал тудуп турар. Мал оолдаашкыны март айда эгелээрин малчын дыңнатты. Сиген курлавыры четчир, малының деңгели шыырак.
Кожууннуң чагырга чери кывар-чаар материалды болгаш техниканы аңгылап берип турар. Сумунуң девискээринде болгаш Ленинка арбанында малчын коданнарже чедер оруктарны далбый тыртып, хардан аштаан. Шагаа бетинде аргыжылга оруктарын база катап аштаар бис.
