“Кадык камгалалы” национал төлевилел деткимчези-биле, Каа-Хем кожуунда бо чылын туттунуп турар ээлчеглиг объектилер – Копту-Аксы, Көк-Хаак, Авыйган сумуларда чаа фельдшер-акушер пунктулары.
Административтиг ажыл-агый эргелелиниң директору Урана Монгуштуң дыңнатканы-биле алырга, Копту-Аксы биле Көк-Хаакта тудуг ажылдары 78 хуу күүсеттинген.
Авыйганда объектиниң тудуун «Фаворитстрой» кызыгаарлаттынган харыысалгалыг ниитилел чорудуп турар. Ында ажылдар доостур чадазында. Оран-саваның техниктиг планын тургузуп, түңнел күүсекчи документилерин белеткеп кылып турар.
Каа-Хем кожуунга национал төлевилелдиң кадык камгалалының эгеки чадазын чаартыр программазы-биле мурнуку чылдарда Бүрен-Аксы, Кундустуг, Бүрен-Хем сумуларынга фельдшер-акушер пунктуларын ажыглалче киирген, поликлиника болгаш уруглар салбырын септээнин ТР-ниң Кадык камгалал яамызы дыңнаткан.
Президент Владимир Путинниң эгелекчи саналы-биле “Кадык камгалалы” национал төлевилелдиң чорудуу-биле республикада медицина объектилери туттунуп турарын сагындыраал.
Тываның студентилери буддийжи университеттерде
Дээди өөредилге черлериниң студентилери буддизмниң философиязын, медициназын болгаш сарыг шажын уран чурулгазын өөренип турар.