Каа-Хем кожууннуң Копту-Аксы, Авыйган болгаш Көк-Хаак сумуларында фельдшер-акушер пунктуларын байырлыг байдалга ажытканын ТР-ниң Кадык камгалал яамызы дыңнаткан.
Авыйганчылар ооң мурнунда чоокку сумуже эмчилээр турган. Чаа фельдшер-акушер пунктузунда республиканың медицина колледжиниң доозукчузу Азияна Цибульская фельдшер болуп ажылдай берген. Ол «Өөредилге» национал төлевилелдиң чорудуу-биле мергежилин чедип алган. Медицина ажылдакчызы «Кадык камгалалы» болгаш «Өөредилге» нацтөлевилелдер амыдыралдың деңнелин бедидер арганы берип турарын онзалап демдеглээн.
Чедери берге Көк-Хаак сумузу 482 чурттакчылыг. Фельдшер Валентина Мөңге көк-хаакчыларның кадыкшылының «камгалалында» 43 чыл дургузунда ажылдап турар. Ол ам чаа оран-савага аарыг улусту таарымчалыг байдалдарга хүлээп эгелээн.
Копту-Аксының чурттакчылары база таарымчалыг байдалдарга бирги эмчи дузазын алыр аргалыг апарган. Эмчилерниң хайгааралында 608 кижи бар, оларның 199-у – уруглар. Кадыкшылының байдалы-биле харык-шинээ кызыгаарлыг 40 эмнедикчи бар. Баштайгы медицина пунктузу 1936 чылда туткан турган.
ТР-ниң кадык камгалал сайыдының бирги оралакчызы Марианна Куулар Копту-Аксы, Авыйган болгаш Көк-Хаак сумуларының чурттакчыларыга чаа медицина албан черлерин ажыглалче кииргени-биле байыр чедирген. Фельдшер-акушер пунктулары медицинаның чаңгыс аай информация системазында коштунган. Ооң ачызында хүлээп алыышкынга келген улус тускай мергежилдиг эмчилерже бижидип алыр аргалыг апарган.
Медицина объектилери «Кадык камгалалы» национал төлевилелдиң кадык камгалалының эгеки чаданың чаартылгазы программазының күүселдези-биле туттунуп турарын сагындыраал.
