Каа-Хем кожуунга мал чеминиң белеткелин шапкынчыдарынга тураскааткан хол кадыыры-биле сиген кезер маргылдаа Ильинка сумузунуң девискээринге болуп эрткенин чагырга чери дыңнаткан.
Аяс-кааң чайгы хүнде киржикчи бүрүзү бодунуң кайы хире дүрген болгаш шынарлыг сиген кезерин көргүскен. Сиген шөлүнге күш-ажылчы маргылдаага шылгараар тура-соруктуг Сарыг-Сеп, Бүрен-Хем, Көк-Хаак, Ильинка, Кундустуг сумуларындан командалар киришкен.
Шыырак сигени кезикчилери киржип келген болгаш, маргылдаа дыка чидиг демиселге эрткен. Үш кижиден тургустунган командалар сиген кезип турда, чүгле кадыырлар хыылаар. Сигенни дүрген болгаш шынарлыг кезип, шылгараары белен эвес херек. Ол чүгле күштен эвес, билдилиинден база хамааржыр.
Кожуун чергелиг күш-ажылчы маргылдааның түңнелинде дараазында командалар шылгарап үнген. Сигенни дүрген болгаш шынарлыг кескеш, Бүрен-Хем сумузу бирги черже үнген. Ийиги болгаш үшкү черлерни Сарыг-Сеп биле Көк-Хаак сумулары тус-тузунда ээлээн.
