Бөгүн Сарыг-Сеп суурда С.О. Тамба аттыг төп үлегер-майыктың ном саңынга «Каа-Хемниң хаяазы» чечен чогаал каттыжыышкыны ажыттынганын Каа-Хем кожууннуң чагырга чериниң даргазы Евгений Ооржак дыңнаткан. Кожуун ат-сураглыг чогаалчылары, шүлүкчүлери, очулдурукчулары болгаш дыл эртемденнери-биле алдаржып турарын ол онзалап демдеглээн.
Байырлыг ажыдыышкынга Тываның ат-сураа билдингир чогаалчылары – Ч. Кара-Күске, Н. Куулар, А. Шоюн, С. Комбу, М. Күжүгет, С. Өндүр олар киришкен.
Евгений Ооржак чагырга чериниң мурнундан хүндүлүг аалчыларга болгаш кожууннуң чогаалчыларынга каң дег кадыкшылды, чогаадыкчы чедиишкиннерни болгаш хей-аът кириишкин-биле ажылдаарын күзээн.
Кол библиограф Людмила Лагба төп ном саңы база «Каа-Хемниң хаяазы» чечен чогаал болгаш хөгжүм каттыжыышкыны кожууннуң чагырга чериниң деткимчези-биле «Чоннуң амыдыралы – чогаал көрүнчүү» деп уран чогаал болгаш шүлүктер мөөрейин чарлаанын мооң мурнунда дыңнаткан турган.
– Мөөрейни Каа-Хем кожууннуң төву – Сарыг-Сеп сууру тургустунганын бээр 120 чыл оюнга тураскааткан. Хемчегниң кол сорулгазы – Тываның улуг суурларының санынче кирип турар суурнуң база кожууннуң төөгүзүн болгаш амгы үеде амыдыралын ханы утка-шынарлыг чогаалдарга мөңгежидери, аныяк-өскенниң ада-чуртчу болгаш интернационалчы кижизидилгезин күштелдирери, тускай шериг операциязының киржикчилери – эрес-дидим каа-хемчилерниң овур-хевирин чеченчидип, чоннун сеткил-сагыжынга арттырары база чоннун чогаадыкчы идепкейин болгаш хей-аъдын көдүрери.
Чогаадыкчы каа-хемчилерни, идепкейжи номчукчуларны ном саңы мөөрейже киржиринче чалап тур. Ооң негелделерин удавас чарлаптар бис.
