Тываның кадет корпузунуң медицина пунктузунда диш эмнээр кабинет ажыттынганын ТР-ниң Кадык камгалал яамызы дыңнаткан.
Диш эмнээр кабинетте дээди категорияның эмчизи Андрей Таштандинов биле эмчи сестразы Аржаана Куруу ажылдап, кадеттерни шынарлыг эмнээшкин-биле хандырып турар.
Кадеттер ам өөредилге черинден үнмейн, чаа кабинетке диштерин эмнедип алыр аргалыг апарган. Диш эмчизи аарыг уругларның баштайгы байдалын шинчилээн соонда, шынарлыг эмчи дузазын чедирер.
Чоорту гигиенист эмчиниң ачы-дузазын чедирери көрдүнүп турар. Уруглар диштерин доктаамал аштаары – кадык диштерлиг болурунуң база аас иштиниң аарыгларын болдурбазының идегелдиг аргазы.
Кижи бүрүзү диштериниң байдалынче сагыш салып, чылда диш эмчизинге ийи катап барып, хынадып алырын утпазы чугула. Кариестиң тыптып болур эге демдээн эмчи ынчан эскерип каар. Кадеттер ам өөредилгезинден чардыкпайн, диштерин эмнедип алырлар.
