Тывада чаа мергежилди шиңгээдир күзелдиг ажыл чок хамаатылар дагжы, эптекчи, бызаңчы, дуңзаакчы мергежилге өөренип болур аргалыг.
«Кадрлар» национал төлевилелдиң «Ажыл-агыйга хаара тударын деткиир дээштиг хемчеглер» федералдыг төлевилел езугаар, Тываның тудуг техникуму «Россияда ажыл» кадрлар төвү-биле кады, күш-ажыл рыногунда хереглелдиг мергежилдерге өөредилге программаларын чорудуп турар.
Кадрлар төвүнүң дыңнатканы-биле алырга, чоокку үеде 51 кижини өөредилгеже хаара тудар – техникум амгы үеде өөренир күзелдиг улустуң киирген документилерин хынап турар. Октябрь 20-де кичээлдер эгелээр, ол бир ай хире уламчылаар.
Күш-ажыл рыногунуң амгы негелделеринге дүүштүр теоретиктиг болгаш практиктиг өөредилгени программада киирген. Өөренип турарлар ажылдаарынга херек билиглерни болгаш мергежилдерни шиңгээдип алыр. Тываның тудуг техникумунуң арга-дуржулгалыг башкылары болгаш бүдүрүлге өөредилгезиниң мастерлери кичээлдерни эрттирер. Курсту дооскан соонда, профессионал белеткел эрткениниң дугайында сертификаттарны тыпсыр.
Программаның чугула кезээ – ажылга тургустунарынга дузалажыры. Техникум «Восток», «Суугу», «Өлчей» дээн ышкаш, республикада мурнакчы тудуг компаниялары-биле кады ажылдап турар. Ол организациялар доозукчуларга ажылчын олуттарны бээринге белен. Ынчап кээрге, программа чүгле тускай мергежилдиглер белеткээринден аңгыда, регионда ажыл чок чорукту эвээжедиринге дузалаар.
Кадрлар төвү Тывада тудугжу мергежилдерге хереглел езугаар ажылчыннарның мергежилин бедидер арганы берип турар болгаш, ол эгелээшкинни онза чугула кылып турарын демдеглээн.
Республиканың дыка хөй чурттакчылары өөренип алгаш, боттарының амыдырал-чуртталгазын өскертип, ниитилелге төлептиг черни ээлеп алырынче чүткүлдү оттурар.
