ТР-ниң Кадык камгалал яамызы «Кадык амыдыралче орук» төлевилелди 2025 чылда боттандырганының түңнелдерин үндүрген. Эмчи ажылдакчылары төлевилел чорудуу-биле республиканың 13 муниципалдыг тургузугларынче 50 үнүүшкүннү чоруткан. Аарыгларны эртежик илередип, чурттакчы чоннуң кадыын тодарадырынче угланган 12533 эмчи шинчилгезин кылган.
Республика чурттакчыларынга эрттирген эмчи шинчилгелерин сайгарып көөрге, тодарттынган аарыглар аразындан хан эргилдезиниң аарыглары эң нептереңгей болуп, 43 хуу болган. Ийи дугаар черде эң нептерээн аарыгларга карак аарыглары болгаш бес аарыглары хамааржыр. Боостаа-думчук аарыглары – үшкү черде.
Үнүүшкүннүг шинчилелдер үезинде 8080 диагностика хемчээн чоруткан. Тодаргайлаарга, 2779 херээжен кижиге маммографияны эрттирген, оларның 216-зы аарыг болган. 3131 кижи флюографияны эрткен, оларның 36-зында аарыгның им-демдектери бар болган. 1695 аарыг кижиге УЗИ-ни кылган, ооң иштинде хан-дамырларга, ижин-шөйүндү органнарынга, бүүректерге, бестерге болгаш хол-буттар бажында хан-дамырларга. Ол ышкаш эндоскоптуг шинчилелдерни база кылган.
Көжүп чоруур фельдшер-акушер пунктуларынга 587 херээжен кижини гинеколог эмчи хынаан, оларның 382-зи аарыгларлыг болган. Оларның аразында көп-белдир кезээнде дегдирген аарыглар эң нептереңгей болган.
Тываның Баштыңы Владислав Ховалыг 2025 чылдың январьда республиканың депутаттарынга Айыткалын берип тура, «Кадык амыдыралче орук» төлевилелин саналдап киирген. Ук төлевилел республикада элээн каш чылдарда чедиишкинниг ажылдаан «Кадыкшыл оруу» төлевилелин уламчылаан. Бо чаа эгелээшкинниң бир угланыышкыны – чаштарның кадыкшылын шинчиир «Уругларның кадыкшылынче орук» деп тускай төлевилел болган.
Владислав Ховалыг чаа эгелээшкиннерни чарлап тура, регионнуң чурттакчы чонунуң кадыкшылын экижидеринге идигни бээр диагностика, эмнээшкин, реабилитация хемчеглеринче кичээнгейни салган. Төлевилелдер улуг улустуң болгаш бичии уругларның аарыырының чылдагааннарын эрте тодарадып, улаштыр эмчилээриниң чаа аргаларын тургузуп бээри-биле дээштиг.
