Бөгүн Аныяктар ордузунга Бүгү делегейниң кадыкшыл хүнүнге тураскааткан хемчеглер болуп эрткен. ТР-ниң кадык камгалал сайыды Анатолий Югай байыр чедирип, хуралды ажыткан.
Терапия болгаш профилактиктиг медицинаның национал медицина эртем-шинчилел төвүнүң каттыштырган профилактика программаларының лабораториязының удуртукчузу Мария Лопатина онлайн хевирге киришкен. Ол илеткелин кылган соонда, «Херээжен – кадыкшылдың модели» деп төлевилелди ажылдатканын дыңнаткан.
ТР-ниң Хөй-ниити кадыкшылга болгаш медицина профилактика төвүнүң төлээзи Анастасия Хомушку сөөк-даяа аарыг улуска тускай херекселдер-биле эмнээшкинни чорутканын дыңнаткан.
«Херээжен – кадыкшылдың модели» деп төлевилелди амыдыралда боттандырар дээш телеграм каналды ажыттывыс. Амдыызында ында 700 ажыг херээжен улус хаара туттунуган. Апрель 8-тен тура ук төлевилелдиң чорудуу-биле өөредилге эгелээр. Бодум база аңаа өөренир деп турар мен» деп, Анастасия Хомушку дыңнаткан.
“Ада-чурттуң камгалакчылары” регионалдыг күрүне фондузунуң төлээзи Сырга Куулар “Тускай шериг операциязынга киржип чораан хоочуннарның кадыкшылын катап тургузарынга өг-бүлезиниң ролю», Ажаалга банкызының Кызылда салбырының башкарыкчызы Алина Таспанчик «Сберкадыкшыл: Кадык камгалалынга амгы үениң технологиялары – Тываның эмнедикчилериниң ырактан мониторингизи» дээш оон-даа өске солун болгаш ажыктыг илеткелдерни кылган. Ол ышкаш «Херээженнер кадык ниитилел дээш» деп шуулгандан видеороликти бараалгаткан.
Республиканың медицина албан черлериниң организастаан аңгы-аңгы шөлчүгештеринге дерматолог, гериатр, эндокринолог, онколог, психолог дээш, өске-даа эмчилер келген чонну шинчилеп, кадыкшылының байдалын хынаан.
Аныяктар ордузунуң даштында маммография болгаш флюорография шинчилгезин эртип алыр автомашиналарны тургузкан.
ТР-ниң Кадык камгалал яамызы, Хөй-ниити кадыкшылга болгаш медицина профилактика төвү Кадыкшыл хүнүнге тураскааткан хемчеглерни организастап эрттирген.
