Национал школа хөгжүдер институт 2025 чылдың баштайгы ажыл хүнүнде ужуражылга болуп эрткенин институт дыңнаткан.
Тыва Республикада 2024-2033 чылдарда тыва дылдың хөгжүлдезиниң күрүне деткимчезиниң эчис сорулгаларда салдынган ажылдарның бир угланыышкыны – кадыкшылының байдалы-биле харык-шинээ кызыгаарлыг өөреникчилерге тыва дыл башкылаар дидактиктиг шугумну ажылдап кылыры болур.
Бо удаада Национал школа хөгжүдер институт биле Кызыл хоорайның 10 дугаар школазының арга-дуржулгалыг башкылары – дээди категорияның логопеди Алефтина Ондар, эге класстар башкызы Надежда Монгуш, 5-9 класстарның тыва дыл, чогаал башкылары Лариса Ашак-оол, Агнас Салчак олар-биле кады кадыкшылы кошкак уругларга 1-4 класстарга «Үжүглел», «Тыва дыл» өөредилге номнарын болгаш аас чугаа сайзырадылгазынга «Шын чугаалап өөрен» деп номну чаартыр ажылдар дугайында дугуржулга болган.
Бо школаның башкыларының хөй чылдарда ажылдап келген арга-дуржулгазы улуг болгаш үре-түңнелдиг. А Б. Ондарның «Шын чугаалап өөрен» деп 2012 чылда Кызыл хоорайга үндүрген ному-биле республиканың дыка хөй башкылары үре-түңнелдиг ажылдап чоруур, орус дылды багай билир уруглар база арыг тыва дылга чугаалай берген таварылгалар хөй.
Кадыкшылының байдалы-биле харык-шинээ кызыгаарлыг уруглар-биле ажылдап чоруур башкылар эвээш эвес. Сонуургалдыг болгаш санал-оналдыг, сүмелелер киирер күзелдиг номчукчулар дараазында телефонче 8 (394)-22-6-44-23 долгап болурун институт медеглээн.
