Аржаан суурнуң культура бажыңынга «Кайгамчыктыг кунчушкулар», «Найыралдыг кудашкылар» деп мөөрей болуп эрткен.
Кунчушкулар биле кудашкылар эптиг-демниин көргүскен. Мөөрейге Аржаан, Тарлаг сумуларындан, Турандан сагынгыр-тывынгыр, салым-чаяанныг, шевер болгаш идепкейжи кадыннар киришкен. Киржикчилер чогаадыкчы чоруу-биле чыылганнарны кайгаткан. Олар боттарын шүлүктеп тургаш чечен-мерген таныштырып, чогаадыкчы чоруун база уран салым-чаяанын көргүскен.
«Кайгамчыктыг кунчушкулар-2026» деп атка Аржаан школазының директорнуң чөвүлекчизи Ажыкма Тюлюш кунчуузу «Аленушка» уруглар садының паштанчызы Саяна Тюлюш-биле төлептиг болган.
«Найыралдыг кудашкылар-2026» аттың эдилекчилери Аржаан суурнуң «Энелер» хоочуннар чөвүлелиниң кежигуннери, тускай шериг операциязының киржикчилерниң хүндүлүг авалары Любовь Шажоловна биле Мария Доржуевна.
«Салым-чаяанны кунчушкулар», «Мерген угаанныг, холу чемзиг кунчушкулар», «Сагынгыр-тывынгыр, эптиг-демниг кунчушкулар» аттарны алган тиилекчи кадыннарны база демдеглеп, шаңнап-мактаан.
Хемчегниң эрттирикчилери мөөрейниң киржикчилеринге, ырак-чооктан келген «аарыкчыларга», аалчыларга болгаш деткикчилер Оюмаа биле Орлан Донгактарның өг-бүлезинге четтиргенин илереткен.
Мөөрей солун болгаш бедик деңнелге эрткен.
