Тываның А. С. Пушкин аттыг национал ном саңының чурт-шинчилел чогаалының болгаш национал библиография килдизиниң ажылдакчылары Кызылдың 2 дугаар школазының 6 «г» клазының өөреникчилеринге Шагаа байырлалын уткуштур тыва оюннарны эрттиргенин ном саңы дыңнаткан.
Уругларга Шагаага канчаар белеткенирил? «Бүдүү хүн деп чүл?», «Чолукшулга езулалы деп чүл?» деп билиглерни таныштырган. «Аът шалбадаары» деп оюнну өөредип тайылбырлааш, ойнатканнар. Сандан Одай идепкейлии-биле киришкеш, бирги черге төлептиг болган. Ийиги черни Чимит Ооржак, үш дугаарын Сайын-Белек Хертек алганнар.
«Кажык-биле аът чарыштырары» деп солун оюнну база эрттирген. Ном саңының ажылдакчылары уругларга кажык-биле кандыг оюннар ойнаарын көргүзүп, тайылбырлаан. Күзелдиг уругларны кажык-биле аът чарыштырарынга мөөрейлештирген. Түңнелинде Сайын-Белек Хертек бирги черге төлептиг болган. Ийиги черни Аймира Сат, үшкүзүн Эчис Бегзи алган.
Идепкейлиг киришкен уругларга шаңнал бижиктерни тывыскан. Уруглар кажык оюнун аажок сонуургап, четтиргенин илереткеннер.
