ТР-ниң Чазак Даргазының оралакчызының хүлээлгезин күүседип турар Айдыс Сынаа хоойлуга удур арага садып турар улуска кандыг-даа чиигелде турбас ужурлуг дээрзин соцчеткиде бодунуң блогунда бижээн.
– Эрткен неделяда Бии-Хемге эзирик алгыш-кырыштың түңнелинде аныяк кыс амы-тынындан чарылган. Чөөн-Хемчикке ооң мурнунда шииттирип чораан, чоокта чаа хосталгаже үнген хамааты өлүрүүшкүн кылган. Улуг-Хемге эзирик чогуш-содаа үезинде үш хамааты бир кижиниң амы-тынынга четкенинге каразыттырып турар. Чеди-Хөлде өгнүң эзирик ээзи кадайын чаңгыс эвес удаа бижектээн.
Бо чүгле чаңгыс неделя дургузунда болган болуушкуннар-дыр. Кол чылдагаан – арага.
Кожууннарывыстың удуртукчуларын база кыйгырар-дыр мен. Чажыт, хоойлуга удур арага садып турар улуска кандыг-даа чиигелде турбас ужурлуг. Бүрүткелде турар өг-бүлелерни, хамаатыларны шыңгыы хайгааралга ап, бодуңарның девискээриңерде байдалды ыяк билир турар ужурлуг силер.
Араганың хайындан өлүрүүшкүннерниң, орук озал-ондааның, эзирик чогуш-содааның, алгыш-кырыштың саны көвүдеп турары дүвүренчиг-дир. Куда азы орнукшудулга соонда болган аар кем-херек үүлгедиишкиннер саны база эвээш эвес-тир. Ёзу-чаңчылдарывыска хамаарылгавыс ындыг болур эвес? Ɵзүп орар салгалга кандыг үлегер көргүзүп турар бис? Арага кажан-даа эки чүүлге чедирбейн чораан, ону утпас болза эки.
