Тываның кадет корпузунга тыва чоннуң ынак артизи Анзат Шожал-Доржуевна аалдап кээп, солун ужуражылга-кичээлди эрттиргенин өөредилге чериниң тыва дыл болгаш чогаал башкызы Лидия Ооржак дыңнаткан.
– Ужуражылга "Чечен чогаал болгаш театр" деп немелде өөредилге кичээли-биле холбаалыг. "Чогаал", "шии", "артистер", "көрүкчүлер", "киржикчилер", "эпизодтуң маадырлары" дээн билиглерни Анзат Куулар амыдыралчы чижектерге даянып, солун таныштырган.
Ол ышкаш кижиниң амыдыралы – чогаалдарда дээрзин артист уран номчулга, ыры-шоор-биле бадыткаан.
«Бүдүн делегей – театр, а ында кижилер – актёрлар» дээн Уильям Шекспирниң метафоразы, кижи бодунуң чуртталгазында, янзы-бүрү рольдар ойнап чоруур сценада артистер дег, тургустунган байдалдарга дүүштүр "ойнап" чурттап чоруур дээрзин ойзуп каан.
Уруглар артист амыдырал дугайында сонуургал-биле дыӊнап, айтырыгларны аалчыга салып турганнар. Артист кижи дег, кандыг-даа маска кедер (кандыг-даа роль күүседир) таварылга тургустунуп келзе, биче сеткилдиг, эки кижи болуру чугула дээрзин ужуражылганың киржикчилери түңнеп сайгарып турган.
Чогаалга сонуургалдыг өөреникчилер аалчыга өөрүп четтириишкинниң демдээ кылдыр аянныг номчулганы күүсеткеннер.
Амыдыралда кандыг-даа байдал келзе, бодун сула салдынмазын, бот-боттарын деткижип чурттаарын А. Ш-Д. Куулар болгаш чогаал башкызы Яков Монгуш уругларга чагаан.
Артистиң оюн-көргүзүү уругларга өөрүшкүнү сөңнээн.
