Тываның өөредилге сайыдының хүлээлгезин күүседип турар [id16282405|Ренат Ооржак] Кызыл хоорайның солагай талакы эриинде дачаларда 18 дугаар школазынга ада-иелерниң хуралын эрттиргенин яамы дыңнаткан.
Сайыт ада-иелер-биле кады өөредилге ажыл-чорудулгазының чугула айтырыгларын, ооң негелделерин болгаш уруглар кижизидилгезин сайгарып чугаалашкан.
– Ада-иелерниң чыглып келген айтырыглары хөй болду. Чижээлээрге, школаларда өөреникчилер санының хөйү, школалар мурнунда машина оруу, өөредилге албан черинге чедир уругларның айыыл чок чоруун хандырары-биле светофорларны тургузары, тыва дыл кичээлиниң шактарын көвүдедири, өөредилге номнарының чедишпези, школачыларның хостуг үезин шын ажыглаары, спортчу оран-саваларны немей тудары дээш оон-даа өске. Шак мындыг ужуражылгалар санал-бодалдар солчуп, уруг бүрүзүнге шынарлыг болгаш чедимчелиг өөредилгени бээринге дузалыг – деп, Ренат Ооржак демдеглээн.
Ада-иелерниң тургускан чамдык айтырыгларын шиитпирлээри-биле, өске албан черлери-биле харылзажыры чугула. Чижээлээрге, Хөй хүлээлгелиг төптүң ажыл-ижи, культура албан черлериниң тудуу, айыыл чок чоруктуң орук картазы.
– Ол ышкаш башкыларның аңгы-аңгы акциялар-биле чүдүрттүнгенин чугаалаштывыс. Ындыг чүүл турбас ужурлуг. Башкыларны ажыл шагының соонда, хайгааракчы кылып алган «акцияларны» соксадырының дугайында яамының тускай мергежилдиглери-биле база аңгы чугааны кылыр мен. Ооң чижээнге «Бажыңда мен» деп акция хамааржыр. Башкылар кежээниң-не ада-иелерден уруг бажыңында деп бадыткаан чуруктарны чыып турар. Бо акцияны үре-түңнел чок болгаш, башкы кижиниң үези халас чардынып турар деп бодаар мен (башкылар орайга чедир чуруктарны чорудуп бээрин манап турар).
Россияның өске кайы-бир булуңунда ындыг практика барынга чигзинип тур мен. Хөй кезиинде ада-иениң телефонундан уруг боду медээни чорудуп бээр азы шынга дүүшпес медээлерни чорудуп бээри чажыт эвес. Бо таварылгада школачы комендант шагының дүрүмүн үреп, орай кежээ улуг улустуң хайгааралы чокка кудумчуга чорааны илереп турар. Школаның девискээринден үнген соонда, уруг ада-иениң камгалал-хайгааралынга турар ужурлуг. Ол дээш ада-ие харыысалгалыг. Өг-бүле кижизидилгезиниң дугайында утпас ужурлуг бис. Школа чүгле билиг бээр болгаш кижизидилге ажылынга дузалажыр – деп, сайыт түңнээн.
Тываның Өөредилге яамызы ТР-ниң Адалар чөвүлелиниң даргазы-биле школачылар болгаш студентилерниң кижизидилгезинге хамаарышкан айтырыглар-биле кады ажылдаарын дугурушкан.
