Тыва үндезин культура төвүнүң идик-хеп даараар мастерскаязында салым-чаяанныг ус-шеверлер ажылдап турарлар. Оларның бирээзи Клара Донгак дээрзин төп дыңнаткан.
Клара Александровна Тывада эң-не билдингир, 50 ажыг чыл стажтыг хеп быжыкчызы, шыырак шеверлерниң тергиини. Бодунуң ажылынга сеткили-биле бердинген, үндезин тыва хептиң байдалы дээш кезээде сагыш-човап чоруур.
Шеверниң холу-биле даараан үндезин тыва хептерни ады-сураа билдингир кижилер, артистер, мөгелер эдилеп кедип чоруурлар. Бир дугаарында, чагыдып алыкчыларның хептиң үндезин хевир-биле быжып даараанын, шевергинин бо-ла эскерип, магадаарлар.
Клара Донгак хөй делгелгелерниң, конференцияларның, мөөрейлерниң идепкейлиг киржикчизи. Ооң хууда мастер-класстарынга улус хөйү-биле сонуургап чедип келир.
Бир эвес шеверге чараш тыва тонну даарадып алган болза, дараазында салгалдар ол тонну кедип болур. Чүге дээрге ооң холу-биле быжып даараан хептер дыка эптиг, шевергин болгаш быжыг болур.
Чон караанга көзүлбес-даа болза, ооң кылып чоруур ажылын чон дыка үнелеп чоруур. Шевер Чөөн-Хемчик кожууннуң Хайыракан суурунга төрүттүнген.
