Бии-Хем кожууннуң Аржаан сумузундан үшкү классчы Ариана Ооржактың күзелин ТР-ниң Орук-транспорт комплекизиниң яамызы “Күзелдер шивизи” акцияның ачызында боттандырган.
Бичии Ариана өзүп келгеш, борт үдекчизи болур күзелдиг. Аржаанның чагырга чериниң даргазы Екатерина Тулуш школачының күзелин боттандырар дээш, ТР-ниң Орук-транспорт комплекизиниң яамызының удуртулгазынче дилегни киирген, албан чери «КрасАвиа» авиакомпаниязы-биле дугурушкан.
Ариана Ооржак борт үдекчизи Елена Мельникова-биле ужурашкан. Самолет иштинге экскурсия үезинде ол бичии аалчызынга «Күзел күштүгде, кандыг-даа мергежилди чедип ап болур. Борт үдекчизи улус-чон-биле эвилең-ээлдек, бодун шын алдынып билир болур ужурлуг. Берге байдалдарда сүрээдээчел болбазындан эгелээш, дурт-сынны доктаамал шилгедек тудары дизе-ле, хөй-ле чүүлдерге дээди өөредилге черинге өөредир. Эң-не кол негелге – 100 хуу быжыг кадыкшыл» – деп, ол чагыг-сөзүн берген.
Аян-чорукчулаарынга ынак кыс “Туваавиа” авиакомпанияның вертоледунга ужудукчунуң кабиназынга олуруп, ооң иштин бүрүнү-биле өөренип көөр аргалыг болган.
ТР-ниң орук-транспорт комплекизиниң сайыдының оралакчызы Денис Хангай Ариана Ооржактың дээди өөредилге черинче киреринге дузалаарын аазааш, чигирзиг белекти сөңнээн.
Тос харлыг Ариана бо ужуражылга ооң сеткилинге уттундурбас болуп артып калганын дыңнаткан. Ооң стюардесса болур күзели улам-на күштелген.
Аржаан суму чагыргазының удуртулгазы ТР-ниң Орук-транспорт комплекизиниң яамызынга, «КрасАвиа» болгаш “Туваавиа” авиакомпанияларга четтиргенин илереткен.
