Крещениеде сугже кирип, айыс алыр езулалга белеткел доозулган

Православ шажын чүдүлгелиглерниң Крещение хүнүнде ыдыктаан сугга кирип, айыс алыры – чугула байырлалдарның бирээзи.

Январь 18 дүнезинде, баш бурунгаар белеткээн сугга кирер черге ыдыктаар езулалды эрттирер. Кызыл хоорайда Вавилин ээтпээниң 5-ки база 6-гы километрлер аразында участокта сугда дошту оюп, тускай черни баш бурунгаар кылган. Айыыл чок чорук дүрүмнеринге дүүштүр доштуң кылыны 25 см-ден бичелевес ужурлуг.

Россияның Онза байдалдар яамызыныңТывада кол эргелелиниң биче хемчээлдиг хемелер талазы-биле күрүне инспекциязы төптүң начальнигиниң орлакчызы Аяс Ойдовтуң чугаазы-биле алырга, хемниң дожун тускай мергежилдиглер хемчээген, Вавилин ээтпээнде шилиттинген девискээрде доштуң кылынын 90 см чедип турар, ынчангаш кижилерге айыыл чок.

Ужур-дүрүм эдерип, сугже киреринге эптиг кылдыр, чаданы туткан. Тываның Чуртталга-коммунал ажыл-агыйы база Одалга болгаш энергетика яамыларының специалистери езулал эртер черниң чырык-биле хандырылгазын организастаар.

Январь 18-тен 19 дүнезинде сугже кирип, айыс ап келгеннерниң айыыл чок чоруун хандырар дээш, дүрген дуза эмчилери, өрт-камгалал база хөй-ниити чурумун камгалаар ажылдакчылар, ТР-ниң Баштыныңы Администрация болгаш ТР-ниң Чазак Аппарадының харыысалгалыг специалистери дежурныйлаар.

Доштуг сугже кирери чүгле шуут кадык кижилерге ажыктыг болгаш кадыкшылынга айыыл чок дээрзин эмчилер сагындырып тур. Бистиң ышкаш соок агаар-бойдус кижиниң мага-бодунга улуг сагыш-сеткил дүвүрелин болдурар болганда, ол езулалга чоорту белеткенгени дээре.

Бичии уруглар, улгады берген кижилер, иштиг херээженнер, чүрек-дамыр база бестер системазы, тыныш органнары, бүүректер, чүстер база хан базыышкыны аарыг кижилерниң сугже кирери күзенчиг эвес.

Грипп, ОРВИ база Сovid-19-туң бичии-даа им-демдектери бар кижилерниң ынаар семээн ажыы чок – доштуг сугже киргеш, дегдирип болур. Оон аңгыда эзирик кижилерниң эштирин шуут хоруур. Соок сугже кирип, айыс алган соонда, изиг суксун аймаан ижер.

Январь 18-тен 19 дүнезинде Кызылда Воскресенск кафедралдыг хүрээге база Ыдыктыг Троицк хүрээзинге Бурганга улуг номнал өргүлүнүң соонда, сугну ыдыктап, айызаар. Шак-ла ындыг езулалдар Туранда ыдыктыг Бурган иезиниң иконазынга тураскааткан Владимир, Бүрен-Бай-Хаакта Николь, Сарыг-Септе ыдыктыг Бурган иезиниң иконазынга тураскааткан Казань хүрээлеринге, Тоора-Хем суурда хемге болур.