Тывага Крымның болгаш маадыр хоорай Севастопольдуң Россия-биле каттышканындан бээр он бир чылын демдеглээн. Чылдың-на марттың 18-те күрүне байырлалы «Крымның чазы – кезээ мөңгеде кады!» деп кыйгырыг-биле эртип турар.
Улуг-хемчилер Алдар шөлүнде Совет Эвилелиниң Маадыры, Тыва эки турачыларның аъттыг шериг эскадронунуң командири Түлүш Балдаңович Кечил-оолдуң тураскаалының баарынга митинг-концертке киришкенин чагырга чери дыңнаткан.
Он бир чыл бурунгаар, 2014 чылдың март 18-те, Крым Республика биле Севастополь хоорай төөгүлүг төрээн чурту – Россия-биле база катап каттышкан. Бо төөгүлүг болуушкун 2014 чылдың март 16-да референдум-биле быжыглаттынган. Референдумнуң түңнелдеринден алырга, Крымның чурттакчыларының 96,77 хуузу, Севастопольдуң чурттакчыларының 95,6 хузу Россия-биле каттыжарын деткээн.
Крым Республика биле Севастополь хоорай Россия Федерациязының 84-кү болгаш 85-ки субъектилери апарган.
Крым биле Севастополь – Россияның байлак езу-чаңчылдарлыг, культуралыг, бойдус чурумалдыг болгаш чоннуг регионнары болгаш, ооң чарылбас кезээ апарган. Олар чүгле ниити төөгүлүг эвес, а экономиктиг, социал болгаш культурлуг хөгжүлдезинге улуг күчү-күштүг.
