Тере-Хөл кожууннуң төвү – Кунгуртуг суурнуң үндезилеп тургустунганындан бээр 75 чыл оюн эрткен дыштаныр хүннерде спортчу хемчеглер-биле демдеглеп эрттиргенин чагырга чери дыңнаткан.
ТР-ниң культура сайыды Виктор Чигжит Тываның Баштыңы Владислав Ховалыгның мурнундан база бодунуң өмүнээзинден кунгуртугжуларга байырын чедирген.
Тере-Хөл кожууннуң чагырга даргазының экономика, саң-хөө болгаш сайгарлыкчы чорук талазы-биле бирги оралакчызы Тумен Ховалыг 75 чылдың дургузунда төрээн чери дээш кызымаккай ажылдап чораан хоочуннарны шуптузун демдеглеп, шаңнап-мактаанын дыңнаткан.
Тываның аңгы-аңгы булуңнарындан маргылдааларга киржип келген спортчулар тыва эр кижиниң үш оюну – хүреш, аът чарыжы, бар адарындан аңгыда, чадаг чарышка, хол бөмбүүнге, кажыкка, даалыга, панчыкка мөөрейлешкеннер. Тиилекчилерге акша шаңналдарын тывыскан.
– Аът чарыжынга дай аъттар чарыжынга 37 аът, уруг аъттарга 58, челер аъттарга сес мал киришкен. Хүрешке 32 мөге ачыр-дачыр тудушкан. Чөөн-Хемчик кожуундан Андрей Ондар шүүлген. Баг адарынга Евгений Ондар кымга-даа аштырбаан.
Тере-Хөлдү долгандыр маңнааш, сумунуң «Хаан-Тайга» стадионунга черир, ниитизи-биле 20 километр черге 17 оол чарышкаш. «Наадым-2024» малчыннар байырлалынга тураскааткан чарыштың чемпиону – Ак-Довурактан Уяраш Монгуш кымга-даа четтирбээн. Херээжен улус аразынга (10 километр) чарышка Чөөн-Хемчик тен Чойганмаа Монгуш тиилээн.
Панчык оюнунга 128 кижи киришкен. Кунгуртугдан Виталий Базыраа тиилекчи болган.
Байырлалдың деткикчилери – «Ойна» алдын тывыш артели болгаш
«Новый Базас» кызыгаарлаан харыысалгалыг ниитилел – деп, Тумен Ховалыг медеглээн.
ТР-ниң Культура яамызың артистери кунгуртугжуларга болгаш аалчыларга аян тудуп, хемчегни улам-на каастаан.
