Кунгуртуг суурнуң эки турачы өрт дружиназының ажылын демдеглээн

Тываның Чазаанга бо неделяда болуп эрткен аппарат хуралынга, Тере-Хөл кожууннуң Кунгуртуг суурнуң эки турачы өрт дружиназының ажылын демдеглээн.

Россияның Онза байдалдар яамызының Тывада Кол эргелелиниң удуртукчузунуң хүлээлгезин күүседип турар Рустем Салахов дружина кежигүннериниң идепкейин болгаш харыысалгазын, ол ышкаш суурда өртке удур айыыл чок чорукту хандырарынга оларның улуг үлүг-хуузун онзалап демдеглээн. Өрт өжүрүкчүлериниң бо командазы чаңгыс неделяда ийи катап үнүүшкүнче үнген: февраль 3-те – ийи аалдыг чуртталга бажыңынга, а февраль 8-те – хуу садыгга өрттү өжүрген. Өртчүлерниң дүрген хөделиишкиннериниң ачызында ол ийи болуушкун аар уржуктардан чайлаан.

«Онза байдалдар яамызының өртке удур эргелели өрттерге удур демисежиринге белен. Ындыг-даа болза, чоогунда чурттакчылыг черлерде эки турачы өртке удур командаларның болгаш эки турачы өртчүлерниң бары материалдыг когаралды элээн эвээжедип, амы-тынның чидириин болдурбайн турар» – деп, Рустем Салахов демдеглээн.

Республиканың Хамааты камгалал болгаш онза байдалдар херектериниң талазы-биле албанының медээзинден алырга, бөгүнде республика девискээринде эки турачы өрт камгалалының 134 кезээнде 1182 кижи ажылдап турар. Олар федералдыг өртке удур албанның кезектери чок 82 чурттакчылыг черлерни хандырып турар. Эки турачыларны тускай хеп, техниктиг дериг-херекселдер болгаш чогуур техника аймаа-биле чепсеглээн.

Тываның девискээринге чыл эгезинден 94, а эрткен неделяда 17 бажың өрттери демдеглеттинген. Онза байдалдар яамызының медеглээни болза, одалга дериг-херекселдерин шын эвес ажыглаанындан бажыңнарда өрт үнүп турар. Эрткен чылдың эгезинден үжен хире ындыг өрт болган. Россияның Онза байдалдар яамызының Тывада Кол эргелелиниң өрт-камгалал кезектериниң күштери-биле оларны өжүрген.

Онза байдалдар яамызының бодун база чок улузун угарлыг ыштан чайладыр сорулга-биле бажыңнарынга өрт медээчилерин салдырып алырын сүмелээн. Тываның Баштыңы [id360104045|Владислав Ховалыгның] даалгазы-биле сөөлгү каш чылда хөй ажы-төлдүг, амыдыралдың берге байдалында таварышкан өг-бүлелерниң, чер чедип албас хамаатыларның бажыңнарынга ындыг медээчилер салыр ажылды доктамал чорудуп турар. Бөгүнде республикада беш муң ажыг ындыг медээчини салган. Шак ындыг дериг-херекселди садып алгаш, боттары салдырып база болур.

Тускай мергежилдиглер бажыңны одап тура, өртке удур айыыл чок чорук дүрүмнерин сагыырын сагындырган. Печканың мурнунга 0,5 х 0,7 метр хемчээлдиг чуга калбак демирни чадар. Печка чанынга кывыычал чүүлдер шыгжавас, хеп кургатпас. От одаарда дүрген кывар суук чүүлдерни ажыглавас. Үш айда бир катап печканың хоорзаларын арыглап, септеп-селиир.

Кыжын чылыдар дериг-херекселдерни ажыглап тура, ооң айыыл чок ажыглалын сагыыр. Ооң чанынга кывыычал чүүлдер салбас, бажыңдан үнерде токтан уштур.

Өртке удур айыыл чок чоруктуң хемчеглериниң дугайында чурттакчыларның билиин бедидер дээш, камгалакчылар социал албан черлериниң, чагырга черлериниң болгаш корум-чурум камгалаар органнарның ажылдакчылары-биле кады бажыңнарже рейд үнүүшкүннерин болгаш профилактика хемчеглерин чорудуп турар.

Чыл эгезинден 524 ындыг хемчегни организастаан, 2600 ажыг бажың ээлери-биле чугааны чоруткан, өртке удур айыыл чок чоруктуң дугайында үш муң хире медээ хуудустарны тараткан.

#Тывачазак #ТМГМедээлер #Тыва #Тывамедээ #Тывадыл #Тывамедиагрупп #Тува