Кызыл кожууннуң Кур-Чер сумузундан ырак эвесте, Тыва Арат Республиканың 100 чылы деп черде «Чаа сорук» төлевилелиниң 2021 чылдың киржикчилери Айдыс биле Чодураа Бады-Хоолар малын малдап турар. Олар ынчан чээрби инекти алган.
Мал чемин четчир кылдыр белеткеп алганы-биле берге кышты хүр эрткенин өгнүң эр ээзи дыңнатты. Ол чоокта немелде мал чеми – суланы садып алган. Бода малдың чыдынынга херек кургаг өдектиң курлавырын чедер кылдыр белеткээн. Кажар угаанныг куу дайзыннар улужуп чоруп турар, өршээл болуп, кокай харын-даа өдекче кирбээнин Айдыс чугаалап турар.
Бады-Хоолар баштайгы чылында чээрби баш инээнге онааштыр ол-ла хире бызааны онча-менди камгалап алган. Удавас малчыннарның инектери төрүп эгелээр. Бода малдан аңгыда шээр малды база тудуп турар.
Бо хүнде кыштагның девискээринде «Бурсервис» деп чер өрүмнээр компания кудук казып турар. «Чаа сорукчулар» боттарының күжү-биле кудукту кастырып, хүн херели-биле ажылдаар батареяларны садып алганнар. Кыштаанда доктаамал чырык хандырылгазындан аңгыда телевизорну база көрүп турар. Соодукчузун ажылдадып алыры-биле чоорту хүн батареяларын немей садып алырын малчын чугаалады.
Чымыштыг ажыл-иштиг хөй ажы-төлдүг малчыннарның бажыңында газтыг плита бар. Аңаа шай-даа хайындырарга, аъш-чем-даа белеткээрге хөй үе негеттинмес. Бир улуг баллон үш айга чедер. Малчыннар дөрт ажы-төлдүг. Улуу шериг албан-хүлээлгезин эрттиргеш, чанып келген.
ТР-ниң Көдээ ажыл-агый яамызының ажылдакчылары Бады-Хооларның аалынга чедип, малының деңгелип хынап көрген. Ниитизи-биле байдал чүгээр, каш чудаан малды туда азырап турар.
