Улуг-Хем кожууннуң көдээ ажыл-агый эргелелиниң даргазы Болат Ховалыг, мал эмчилери Самага Кунгаа, Янсула Күжүгет, Ийи-Тал сумузунуң эмчизи Ульяна Ензак Ийи-Тал, Хайыракан девискээринде малчын коданнарның ээлери-биле чолукшуп, мал-маганның байдалын хынавышаан, малчыннарның кадыкшылын шинчилээнин чагырга чери дыңнаткан.
Көдээ ишчилер кышты хүр ажып, мал-маганның деңгели шыырак, мал чеми четчирин дыңнаткан. Чүгле кокайлар кедереп турар, чоок-кавы аалдарның коданындан мал тутканын көдээ ишчилер улуг дүвүрел-биле чугаалаан.
Көдээ ажыл-агый эргелелиниң даргазы Ийи-Талдың Барыкта хөй малды тудуп турар малчын Сергей Энге-Маадыр, Чеди-Саңда Виктор Чыртак-биле чолукшуп, ак кадаан, белээн сунган. Малчыннар кыш эки болганын чугаалаан. Улуг назылыг малчыннарның ханының базыышкыны улуг болуп турарын эмчи хынааш, эмнерни үлеп берген.
«Ырлыг-Булак» кызыгаарлаан харыысалгалыг ниитилелдиң коданында хойлар төрүп эгелээн. Аяс Хапык-оол биле Аянай Кыргыстың инээ төрүпкен.
Сенекте малчын Аяс Тумат база кышты хүр эртип турарын, кокайлар халдап турарын дыңнаткан. Кокайлар Барык, Сенек девискээринде өөр болуп алган Сенек үстүнде аалдарның малынче халдап, улуг когаралды чедирип турар. Болат Ховалыг кокай аглаар бригада-биле харылзажырын дыңнаткан.
