Тере-Хөл кожууннуң Балыктыг, Шынаа, Каргы, Эми сумуларында 119 кыштаг барын кожууннуң чагырга даргазының экономика, саң-хөө болгаш сайгарлыкчы чорук талазы-биле бирги оралакчызы Тумен Ховалыг дыңнаткан.
– Көдээ ишчилер кыштаглаашкынны хүр эртер дээш 5147 тонна сигенни белеткээн. Амгы үеде 1720 тонна азы 33,4 хуу мал чеми арткан.
Сумуларның чагырга черлери-биле кады демнежип малчын коданнарже чедер оруктарны далбый тыртып, хардан аштап турар. Суму бүрүзүнге 200 литр чери кывар-чаар материалды аңгылаан.
Чагырга чери көдээ ишчилерге сиген-ширбиилди таарымчалыг өртекке садып-сайгарар дээш, немелде мал чемин саткан. Муниципалдыг курлавырда 35 дүрүг сиген бар. Чоокку үеде малга дус садары көрдүнген. Харлыг кыш болганындан, көдээ ишчилерге немелде мал чеми негеттинип турар.
Чоккта чаа ТР-ниң көдээ ажыл-агый сайыдының албан-хүлээлгезин күүседип турар Юрий Оруспай кожуунга келгеш, малчын кыштагларны эргий кезип, кыштааглашкын кайы хире эртип турарын хынаан – деп, оралакчы дарга медеглээн.
Мал кыштаглаашкыны – көдээ ишчилерге эң-не харыысалгалыг үе. Кожуун, суму чагырга черлериниң болгаш көдээ ажыл-агый эргелелиниң ажылдакчылары кыштаглаашкын болгаш мал чеминиң курлавырынче улуг кичээнгейни угландырып турар.
