Тес-Хем кожууннуң Кызыл-Чыраа ортумак школазы 75 чыл оюн демдеглеп эрттирген. ТР-ниң Дээди Хуралының депутады Роберт Доржу тыва парламентиниң Даргазы Кан-оол Давааның мурнундан школаның коллективинге болгаш хоочуннарынга байыр чедирген.
– Школаның чедиишкиннери өөредилге-кижизидилге ажылында чаа аргаларны ажыглап турарындан кончуг хамааржыр. Бо талазы-биле Кызыл-Чыраа ортумак школазы үениң негелдезинден чыда калбайн чоруур. Школаның чамдык башкылары – республика болгаш кожуун чергелиг чогаадыкчы мөөрейлерниң тиилекчилери. Оларның бедик мергежилиниң, мерген угаанының болгаш шыдамык чоруунуң ачызында муң-муң доозукчу республиканың, а харын-даа чурттуң төлептиг хамаатылары болган – деп, Роберт Доржу байырлыг хуралга чугаалаан.
Депутат байырлыг хүнде башкыларга чаа-чаа чедиишкиннерни, а өөреникчилерге эки өөредилгени күзээш, школаның бөлүк башкыларынга ТР-ниң Дээди Хуралының Хүндүлел бижиктерин тывыскан.
