“Чурттаар чер болгаш хоорай хүрээлеңи” национал төлевилелдиң ачызында Байга-Тайга кожууннуң Кызыл-Дагда хоккей шөлчүгежин байырлыг байдалга ажытканын чагырга чери дыңнаткан.
Бөмбүктүг хоккей маргылдаазынга республиканың аңгы-аңгы кожууннарындан тос команда киришкен. Дош шөлүнге «изиг-изиг» тулчуушкуннарның түңнелинде үшкү черге “Кызыл-Даг”, ийиги черге “Бай-Тал” командалары төлептиг болган. “ОБЯ Тыва” команданың хоккейжилери бирги черни бүзүрелдии-биле чаалап алган.
Кызыл-дагжыларның өөрүшкүзүн кожуун чагыргазының болгаш Төлээлекчилер хуралының удуртулгазы үлежип, байыр чедирген.
Хоккейге ынактар оюн бедик деңнелге эрткенин онзалап демдеглээннер.
