Өвүр кожууннуң чагырга даргазының хүлээлгезин күүседип турар Айдыс Куулар удавас «Кызыл – Хандагайты – Кызыл» аразынга пассажирлер аргыштырар рейс ажыттынарын дыңнаткан.
– Пассажирлер аргыштырар рейсти дарый эгелээр дээш, "Туваавтотранс" кызыгаарлаттынган харыысалгалыг ниитилелдиң директору Айдың Күдерек Узун орук чоруурунга таарымчалыг амгы үениӊ автобузу-биле Хандагайтыга чедип келген. Амыдарал-хандырылга талазын харыылаар оралакчым В.М. Седен-оол-биле ооң-биле ажылчын байдалга ужураштывыс.
Негелделер аайы-биле автобусту хондурар чылыг машина тургузар чер, доктаамал кээр болгаш чоруур чер, аргыжар хүннери болгаш шактары, билеттиң өртек үнези дээш кол-кол айтырыгларны чугаалаштывыс – деп, Айдыс Куулар медеглээн.
Республиканың чурттакчы чону Тываныӊ Баштыӊы Владислав Ховалыгдан кожууннар, хоорайлар аразынга пассажирлер аргыштырар рейстиг автобустарны эгидерин дилээн турганын сагындыраалы.
Бо чылдыӊ төнчүзүнге чедир «Кызыл – Эрзин – Кызыл» болгаш «Кызыл – Хандагайты – Кызыл» рейстери аргыжып эгелээрин регионнуӊ Орук-транспорт яамызы дыӊнадып турар.
