Мөнгүн-Тайга кожууннуң спорт школазының Кызыл-Хая суурда салбырының тургустунганындан бээр 20 чыл оюн таварыштыр Кызыл-Хаяның спорт школазынга албан черлериниң командаларының аразынга хол бөмбүүнге болгаш 2005-2007 чылда төрүттүнген оолдар аразынга тыва хүрешке маргылдаалар болуп эрткенин ук кожууннуң чагырга чери дыңнаткан.
Хол бөмбүүнге 11 команда киришкен. Мугур-Аксындан сес, Мөген-Бүренден үш командалар солун, чараш оюннарны көргүскен.
Түңнелинде бирги черни Онза байдалдар яамызының өрт кезээ, ийиги черни төп кожуун эмнелгези, үшкү черни кожууннуң уруглар садтарының чыынды командазы бүзүрелдии-биле чаалап алган.
«Эң-не эки халдакчы» атка Хертек Аймир, «Эң-не эки көдүрүкчү» атка Тейнин Чинчи, «Универсал ойнакчы» атка Шойдан Аганак олар тус-тузунда төлептиг болган.
Элээди оолдар аразынга хүрешке Мугур-Аксындан сес, Кызыл-Хаядан 24 мөгелер ачыр-дачыр тудушкан.
Чидиг-чидиг сегиржип алыышкыннарның түңнелинде эң шыырак мөгелер шылгарап үнген. I черни Мирон Уула (Кызыл-Хая), II черни Айрат Доктугу (Кызыл-Хая) чаалап алган. III черни Аюш Аралдии (Мугур-Аксы) биле Янзы Дюдюк (Кызыл-Хая) үлешкен.
«Чараш арга» деп тускай шаңналга Кызыл-оол Буянды (Мугур-Аксы), «Чараш содак-шудак» деп шаңналга Аяндай Салчак (Кызыл-Хая), «Чараш девиг» деп тускай шаңналга Аюш Успун олар төлептиг болган.
Тиилекчилерге өртектиг белектерни болгаш акша шаңналдарын тывыскан.
