Сүт-Хөл кожууннуң Кызыл-Тайга суурда «Эзирлер уязы» төлевилел-биле туттунган чаа спорт залын байырлыг байдалга ажытканын чагырга чери дыңнаткан.
Үрде манааны бо болуушкун кызыл-тайгажыларга езулуг белек болган. Ам чалыы спортчулар маргылдааларга белеткенир чаа шөлдүг апарган.
Байырлыг ажыдыышкынга Тываның спорт сайыды Владимир Түлүш, хостуг хүрешке Европа чемпиону Начын Монгуш, кожууннуң удуртулгазы киришкен.
Спорт сайыды тудуг ажылдарынга идепкейлиг киржип турган кызыл-тайгажыларга Өөрүп четтириишкин бижиктерин тывыскан.
Чаа ораг-савага 15-18 харлыг школачылар аразынга хүреш маргылдаазын эрттирген. Сүт-Хөлдүң суму бүрүзүнден чалыы мөгелер ачыр-дачыр тудушкан. Тиилекчилерге өртектиг белектерни тывыскан.
Чооку үеде чаа спорт залындан эрес-кашпагай мөге эзирлер ужуп, девип үнеринге чалаткан аалчылар болгаш тус черниң чурттакчылары бүзүрелдиг.
