Сүт-Хөл кожууннуң Кызыл-Тайга суурда «Эзирлер уязы» төлевилел-биле чаа спорт залын тудуп эгелээнин чагырга чери дыңнаткан.
Тываның Спорт яамызы «Эзирлер уязы» төлевилел-биле биче хемчээлдиг спорт залдарны тудуп эгелээринге сес суур: Бай-Даг (Эрзин кожуун), Самагалтай (Тес-Хем), Аянгаты (Барыын-Хемчик), Кызыл-Тайга (Сүт-Хөл), Ак-Тал (Чеди-Хөл), Чыраа-Бажы (Чөөн-Хемчик), Кызыл-Даг (Бай-Тайга) база Сарыг-Сеп (Каа-Хем кожуун) чагыргалары-биле дугуржулгаларны чарган. Бо чыл төнчүзүнге чедир шупту объектилерни туткаш, ажыглалче киирер.
Тываның Баштыңы Владислав Ховалыг төлевилел боттаныышкыны республиканың көдээ черлерин, бирги ээлчегде хүреш белеткелинче угланган спорт залдар-биле хандырар арганы берип турарын, мооң мурнунда дыңнаткан. Кол инвесторларның бирээзи – «Эльбрусметалл-литий» компанияның деткимчези-биле бо сес залды тудар.
Школачыларны болгаш аныяктарны шимченгир спортче, ооң иштинде республикада нептереңгей спорттуң эң билдингир хевирлериниң бирээзи хүрешче хаара тудары – төлевилелдиң сорулгазы. Тывага төлевилел боттандырылгазы-биле 39 спортчу бичии залды туткан.
Төлевилел негелдези езугаар тудугну чоннуң киржилгезин ажыглап тудар, ТР-ниң Спорт яамызы тудуг материалдарын хандырар болза, арткан чарыгдалдарны муниципалитет бодунга хүлээнир. Эрткен чылдар дургузунда «Эзирлер уязы» спорт залдарын тударынга ниитизи-биле 90 ажыг сая рубль акшаландырыышкынны үндүрген.
Ийи кезектен тургустунган: спортчу улуг залдыг болгаш солуттунуп кеттинер база тренерлерге өрээлдерлиг, сес-булуңчук хевирлиг спортчу объектини ыяштан тудар. Улуг залга спорттуң аңгы-аңгы хевирлеринге белеткелди эрттирер.
