Тываның найысылалы Кызылда Улуг-Хемниң Вавилин ээтпээнде адырда Крещение эжиндириишкининге тускай черни кылган. Январь 18-тиң дүнезинде ынаар чедер дээн кижилерге хөй-ниити транспортун аңгылаан. Россияның Онза байдалдар яамызының Тывада Кол эргелелиниң биче хемчээлдиг хемелер талазы-биле күрүне инспекциязындан чөпшээрелди аңаа алган.
Январь 19-та православ христианнар бир өндүр байырлалын – Крещениени демдеглээр. Ол хүн хүрээлерге улуг номналдар болур, а чүдүлгелиг чон Крещениеде сугда дошту оюп тургаш белеткеп кылган черге кирип алыр аргалыг. Кызылдан дөрт километрде Улуг-Хемниң Вавилин ээтпээнде, эрткен чылын турган черде, суг ыдыктаар черни бо чылын база кылган.
Чазактың ук православ байырлалды эрттирер организастыг комитединиң даалгазы-биле, езулал эрттирер черни айыыл чок чоруктуң негелделеринге дүүштүр кылып турар. Доштуң кылыны 70 сантиметр, адаанда тереңи бир метр 50 сантиметр, агым чок болур ужурлуг. Ойган дошту долгандыр тепкииштерлиг херимчигешти быжыглаан, ынаар чедер орукту арыглаан, ыдыктаан сугже кирер черже чырыкты киирген. Езулалга киржип келгеннерни чылыдар суугуларлыг, хеп солуттунар черлиг, аскыыштарлыг, сандайларлыг ийи улуг майгыннар манап турар. Сугже кирген соонда, изиг шайны аартап, эмчиге хынадып ап болур. Полиция ажылдакчылары, камгалакчылар болгаш дүрген дуза бригадалары дежурныйлаар.
Айыыл-халапты болдурбазы-биле чүгле камгалакчыларның тускай белеткээн черлеринге езулалды кылырын чүдүкчүлерге сүмелеп турар. Дүрген дуза албан черлери берге байдалдарда бирги дузаны чедиреринге белен. Камгалакчылар Крещение байырлалының үезинде тускай белеткел чок черлерге эштип болбазын хынаан рейдилерни чорудар.
Доштуг сугже кирери чүгле шуут кадык кижилерге ажыктыг болгаш кадыкшылынга айыыл чок дээрзин Кадык камгалал сагындырып тур. Чүрек-дамыр база бестер системазы, тыныш органнары, бүүректер, бестер, чүстер аарыы база хан базыышкыны дээн ышкаш, хоочураан аарыгларлыг кижилерниң сугже кирери күзенчиг эвес. Грипп, ОРВИ база Сovid-19-туң бичии-даа им-демдектери бар кижилерниң ынаар семээн ажыы чок – доштуг сугже киргеш, дегдирип болур.
Белеткел чок азы кадыкшылы кошкак улус соок сугже кирген соонда, чүрээниң согуу өскерлип, туруптуп болур. Кадыкшыл байдалын баксырадып албазы-биле, езулалче баар мурнунда эмнедип турары эмчизи-биле сүмележип, дугуржур. Эзирик кижилерниң сугже кирери шуут хоруглуг.
Январь 18-туң 22:00 шактан январь 19-туң 12:00 шакка чедир, «ТЭЦ», «Южный», «Пентагон» автобус доктаамнарындан үнгеш хоорай ишти-биле, ол ышкаш оң талакы дачалардан, Вавилин ээтпээнден база «Кара-Хаак» көвүрүүнден үнер пассажирлер аргыштырар муниципалдыг автобустар-биле Кызылда эштир черже чедип болур.
