Ийи хүннүң дургузунда, Тывада Тургузукчу күш-ажылдың болгаш өг-бүле ыдыктарының чылынга тураскааткан «Күш-ажыл болгаш өг-бүле: чугула чүүлдерниң үези» деп республика чергелиг шуулган Кызылга болуп эрткен.
Шуулганның киржикчилери аңгы-аңгы темалыг шөлдерге өг-бүлениң ыдыктыг чүүлдерин кадагалап арттырарынга база амгы ниитилелге ооң ролюнга хамаарышкан айтырыгларны сайгарып чугаалашкан. 2030 чылга чедир Тыва Республиканың Өг-бүле болгаш демография политиказының эчис сорулгазын боттандырар планче киирер санал-оналдарны ажылдап кылганы – шуулганның ажылының түңнели болган.
Шуулганның эксперттери болгаш киржикчилери дараазында чугула айтырыгларны ооң шөлдеринге чугаалашкан: «Амгы үеде өг-бүлениң ыдыктары болгаш оларның ролю», «Литератураның болгаш буддизмниң мөзү-шынар кижизидилгезинге салдары», «Өг-бүледе арагалаашкын-биле холбашкан чидиг айтырыглар болгаш оларны шиитпирлээриниң аргалары», «Өөредилге системазы: күш-ажыл кижизидилгези болгаш чедиишкинниг өг-бүле», «Назы четпээннерни ажылче хаара тудары болгаш өг-бүлениң күш-ажыл кижизидилгезинге ролю», «Сан-чурагай делегейинде уругларның айыыл чок чоруу: оларны кибер-буллингтен канчаар камгалаарыл», «Өг-бүлелерни онлайн-шөлден камгалаарының практиктиг арга-хевирлерин ажылдап кылыры» дээш оон-даа өске.
Күрүне ажылдакчылары, башкарыкчы эртемденнер, эксперттер, хөй-ниити организацияларының төлээлери, культура ажылдакчылары боттарының билиглерин болгаш арга-дуржулгазын үлежип, эгелээшкиннерни саналдап, санал-оналдарны ажылдап тургузарынга дузалашкан.
Филология эртемнериниң доктору, Россия Президентизиниң шаңналының эдилекчизи Меңги Ондарның удуртуп эрттиргени «Өг-бүлениң ыдыктыг чүүлдери болгаш амгы үе» деп темалыг бирги шөлге эксперттер аныяктарга мөзү-шынар кижизидилгезиниң айтырыгларын, литератураның болгаш буддийжи сөзүглелдерниң ролюн база тыва өг-бүле тургузуунуң төөгүлүг өскерлиишкинин сайгарып көрген.
Шуулганның сөөлгү хүнүнде, «Сылдысчыгаш» салым-чаяанныг уруглар төвүнүң баазазынга база Аныяктар ордузунга киржикчилер өөредилге системазында ургуларның күш-ажыл кижидизилгезиниң, аныяктарны ажылче хаара тударының база сан-чурагай хүрээлелинде уругларның айыыл чок чоруунуң айтырыгларын чугаалашкан.
Шуулганның төнчүзүнде түңнелдерни үндүрүп, үлегерлиг өг-бүлелерни шаңнап-мактаар езулал болуп эрткен.
Тываның Баштыңы Владислав Ховалыг 50 чыл ажыг чыл эгин кожа кады чурттаан өг-бүлелерге тыпсыр «Өг-бүлениң ыдыктарын кадагалап арттырганы дээш» медальды бо чылын бадылаан. ТР-ниң Чазак даргазының оралакчызы Орлан Сарыглар регион удуртукчузунуң өмүнээзинден күрүне шаңналдарын хүндүткелдиг өг-бүлелерге тывыскан.
«Өг-бүлениң ыдыктарын кадагалап арттырганы дээш» медальды 50 муң рубль эдеринчизи-биле дараазында өг-бүлелер алган:
- 50 чыл кады чурттаан Михаил Ховалыгович биле Зоя Сааровна Назытайның өг-бүлези,
- 55 чыл кады чурттаан Кан-оол Арбын-оолович биле Кара-кыс Михайловна Донгактарның өг-бүлези,
- 60 ажыг чыл кады чурттаан Сонгукчу Сазыг-оолович биле Зинаида Манчын-Доржуевна Монгуштарның өг-бүлези.
Оралакчы дарга төлептиг шаңналдар дээш өг-бүлелерге байырын чедирип, кандыг-даа ниитилелдиң чаагай чоруу күш-ажылга харыысалгалыг хамаарылганы угааткан быжыг өг-бүлелер тургузар дээрзин айыткан.
«Ажылынга кызымак – амыдыралга ынак» деп чоннуң мерген чугаазы бар. Бо чылда күш-ажылчы чаа-чаа тиилелгелерни чедип алыр, өг-бүлелерни быжыглаар, республиканың чурттакчыларын каттыштырар дээш боттуг ажыл-херектер-биле ону боттандырары бистиң шуптувуска чугула!» – деп, Орлан Сарыглар чугаалаан.
Ийи хүн үргүлчүлээн шуулганның ажылынга ийи муң ажыг кижи киришкен.
