Сүт-Хөл кожууннуң Суг-Аксы ортумак школазынга Адалар чөвүлелиниң бот-идепкейи-биле «Өлчей» ада-иелер этно-мастерскаязының ажыдыышкынынга тураскааткан кожуун чергелиг «Сыдым байырлалы» болуп эрткенин чагырга чери дыңнаткан.
Байырлыг хемчегге Сүт-Хөл кожууннуң Төлээлекчилер хуралының даргазы [id557644809|Андрей Хертек] киржип, ада-өгбелеривистен дамчып келген аъттың дериин кылыр иживисти кадагалап, өзүп орар салгалдарга дамчыдарының чугулазын айтып, сыдым – хүн бүрүде ажыглаар эт дээрзин онзалап демдеглээн.
Сумунуң адалары чүген, колун, чирим, кымчы өрүүрүнге мөөрейлешкен. Школачылар шеверлерниң арга-дуржулгазын көрүп, өөренип ап турганнар. Олар аът шалбадаарынга база күжүн шенешкен.
Этно-мастерскаяда оолдар, уруглар чылгы малдың дериг-херекселдерин кылыр уран чүүлге өөренип турар. Ол чүгле ус-тывыш кичээлдери эвес, а аныяк-өскенге ада-өгбелерниң билиглерин дамчыдар арга болур.
РФ-тиң Өөредилге яамызының деткимчези-биле Россияның “Билиглер” ниитилелиниң эрттирген ада-иелер каттыжылгаларының эгелекчи саналдарын деткиир мөөрейге Суг-Аксы школазының “Ада-иениң этно-мастерскаязы” тиилээш, 500 муң рубльге төлептиг болганын сагындыраал. Ук акша-хөреңги-биле даараныр машиналар болгаш херек чүүлдерни саткаш, мастерскаяны дерээн.
