Тожу кожууннуң Тоора-Хем суурунуң «Өлчей удазыны» уругларның болгаш аныяктарның чогаадылга төвүнде солун хемчеглер удаа-дараа эртип турарын республиканың немелде өөредилге сайзырадыр төвү дыңнаткан.
«Шеверлер» каттыжыышкынының башкызы Валентина Довут Чаа чылдың шивижигештеринге ойнаарактарны удазындан белеткээриниң дугайында солун мастер-классты эрттирген. Уруглар чаа техниканы күзелдии-биле өөренип, бир-тускай ойнаарактарны кылганнар.
«Тыва чоннуң национал идик-хеви» каттыжыышкынның башкызы Айланмаа Хурбештей «Шай, дус, артыш хавының каасталгазы» кичээлге уругларны төрээн чуртунуң чаагай чаңчылдары-биле таныштырган. Школачылар улусчу уран чүүлдүң делегейинче шымныгып, республиканың культуразының дугайында билиглерни алган.
«Чаа чылдың суй белектери» кичээлди «Хуулгаазын шуру» каттыжыышкынының башкызы Джамилия Кол эрттирген. Салым-чаяанныг башкының удуртулгазы-биле уруглар чараш каасталгаларны болгаш суй белектерни кылып алганнар.
«Суй белектерниң мастерскаязы» каттыжыышкынның башкызы Руслана Кандан «Каасталгаларны болгаш ойнарактарны белеткээри» кичээлге уругларны чук-биле ажылдаарынга өөредип, онзагай ажылдарны хол-биле кылганнар.
Школаларда чогаадыкчы каттыжыышкыннарның башкылары уругларның бүгү талалыг сайзыралынга деткимчени көргүзүп, чаа-чаа чүүлдерни билип алырынга дузалап турар.
