«Өгбелерниң чечен-мергенинге өөрениили» деп республика чергелиг школа назыны четпээн уруглар өөредир албан черлериниң башкыларынга эртем-практиктиг конференция Мөңгүн-Тайга кожуунга болуп эрткенин ТР-ниң Өөредилге яамызы дыңнаткан.
Хемчегниң пленарлыг кезээнге шылгараңгай ажылдап чоруур башкыларны болгаш удуртукчуларны шаңнап-мактаан. ТР-ниң Өөредилге яамызының төлээлери башкыларга чылыг-чымчак сөзүн чугаалааннар.
Конференцияның пленарлыг кезээнге улаштыр Национал школа хөгжүдер институттуң директору база улуг методизи Альбина Монгуш илеткелдерни номчаан. Хемчегде ийи ажылчын шөлчүгеш ажылдап турар. Бирээзинде уруглар садтарының кижизидикчи башкылары, ийи дугаар ажылчын бөлүкте школа башкылары арга-дуржулгалары-биле солчуп, боттарының ажылын чорудуп турарлар. Ниитизи-биле 180 башкы киржип келген.
База ол ышкаш тус черниң ус-шеверлериниң болгаш уруглар садтарыңың кижизидикчи башкыларының ажылдарын делгеп салган.
Хемчегге Мөңгүн-Тайга, Өвүр, Бай-Тайга, Барыын-Хемчик, Улуг-Хем, Чеди-Хөл, Чаа-Хөл, Тожу, Таңды кожууннарның идепкейлиг башкылары база Кызыл хоорайның уруглар садтарының эргелекчилери киржип келгеннер. Шак мындыг хевирлиг республика чергелиг хемчег ийи дугаар чыл болуп эртип турар. Бир дугаар чылын Өвүр кожуун организастап эрттирген.
Шагаа байырлалының Ак айында болуп турар бо конференцияны ТР-ниң Өөредилге яамызы, Национал школа хөгжүдер институт база Мөңгүн-Тайга кожуннуң Өөредилге эргелели эрттирип турар.
