Эрзин кожууннуң Мөрен сумузундан Очур Билчээ «Социал керээ» программазының 2020 чылда киржикчизи. Ол күрүне деткимчези-биле чазаныр чугула херек дериг-херекселди садып алган.
Ажыл-биле бот-хандыртынган сайгарлыкчы бажыңының девискээринде, ыяш-биле ажылдаар мастерскаязының оран-савазын бодунуң күжү-биле тудуп алган. Ус-шевер национал хөгжүм херекселдери (игил, чадаган, чанзы, кеңгирге, дошпулуур), бажың эт-севин (стол, сандай, деспи дээш оон-даа өске эт-сеп) кылып турар.
Очур Билчээ көдээ культура бажыңының ажылдакчыларга хөгжүм херекселдерин база чазап кылган. «Эзирлерниң уязы» төлевилелдиң шугуму-биле туткан спорт залының серизин ооң ыяштан сиилбип кылган ийи метр эзири каастап турар.
– Кызылга «Социал керээ” программазының киржикчилериниң делгелгезинге ажылдарымны делгеп турдум. Чагырга чериниң дилээ-биле Кыргыс хүрээзиниң 250 чылынга ногаан аъттың ылап хемчээли-биле дүрзүзүн сиилбип кылдым.
Ыяштан материал талазы-биле айтырыг арай берге. Чагыглар езугаар хөгжүм херекселин, эт-септи, ол ышкаш гипстен дүрзүлерни база кылып турар мен. Орулга чогум кирип турар. Найысылалдан чиг этти садып алыр-дыр мен – деп, Очур Билчээ чугаалады.
Эгелеп чоруур ус-шевер сайгарлыкчы кылган эт-севиниң шынарынче болгаш көрүштүүнче кичээнгейни угландырып турар.
Сумуда «Социал керээ» программазының ачызында тос кижи ажыл-херээн ажыдып алган.
