Улуг Тиилелгениң 78 чылын таварыштыр Тес-Хемниң төвү Самагалдайда Ада-чурттуң Улуг дайынының маадырлары – Шумов алышкыларга тураскаалды кожууннуң төп ном саңының, культура одааның ажылдакчылары чаагайжыткан.
Кожуун төвүнде тураскаалды 1985 чылда Шумов алышкылар биле Амбын-Ноян аттыг кудумчуларының белдирлешкен черинде туткан. Чыл санында май 9-та – Тиилелге хүнүнде тураскаалдың чанынга чыскаалдар, сактыышкынның шактарын эрттирип турар.
Шумов алышкылар 1942 чылда Каа-Хем кожуундан дайын-чааже эки турачылап чораан. Алды алышкы 11-ги адыгжы дивизияның 3-кү миномет дивизионунга шериг албанын эрттирип турган. Александр – командир, Лука – хараалчы, Василий – мина сыптакчызы, Иван, Авксентий база Семен – бөдүүн дайынчылар турган. Олар Ленинградты камгалаарынга киришкеннер.
Алды алышкының үжү дайынга амы-тынындан чарылган: 1944 чылдың июль 28-те Нарва хоорай чоогунда Апсаре деп эстон хуторга Семен биле Василий, а Иван Латвияга 1944 чылдың декабрь 2-де маадырлыы-биле мөчээн.
Төрээн Тывазынче үш алышкы чанып келген. Дайындан келгеш, Лука колхозка, Авксентий – чазаныкчылып ажылдап чораан. Командир Александр Шумов дайынга балыглаткаш, чанып келгеш, Кызылдың типографияга үр чылдарда ажылдаан. 2012 чылдың май 9-та аңаа “Хөй-ниитиниң үнелели” деп хүндүлел бижикти тывыскан.
Самагалдайжылар дайын маадырлары чаңгыс чер-чурттугларынга чоргаарланып, оларның аттарын кезээ мөңгеде алдаржыдып чоруур.
