Сүт-Хөл кожууннуң хүндүлүг хамаатызы, күш-ажылдың хоочуну, ССРЭ-ниң болгаш Тываның "Маадыр ие" деп хүндүлүг адының эдилекчизи Александра Монгуштуң чырык адын мөңгежидип, Суг-Аксы суурда чаа кудумчуну ооң ады-биле адаан онзагай хемчег болуп эрткенин чагырга чери дыңнаткан.
Сүт-Хөл кожуун чагыргазының, Төлээлекчилер хуралының удуртулгазы чыылганнарга байыр чедирген.
Маадыр иениң 12 ажы-төлү республиканың аңгы-аңгы булуңнарында амыдырап, чедиишкинниг ажылдап чоруурлар. Олар ада-иезиниң база боттарының чурттап чораан бажыңының ханазында тураскаал самбыраны байырлыг байдалга ажыткан. Олар сумунуң хөй ажы-төлдүг 12 өг-бүлезинге тускай белектерни сөңнээннер.
Чыылган чон Маадыр иениң дугайында чылыг, чымчак сактыышкыннарны, төөгүлерни сактып чугаалашкан.
Александра Дундериковнаның уруглары болгаш кожууннуң артистери байырлалды улам каастап, солун концерти чаңгыс чер чурттугларынга бараалгаткан.
