Тываның школачылары «Маадырларга чылыг кыш» акцияда идепкейлиг киржип турарын ТР-ниң Өөредилге яамызы дыңнаткан. Оолдар, уруглар дайынчыларга чылыг, чырыкты сөңнээри-биле, лааларын кылып эгелээн.
«Маадырларга чылыг кыш» акцияның база бир идепкейжилери – Шамбалыг ортумак школазының өөреникчилери. Школаның директорунуң кижизидилге талазы-биле чөвүлекчизи Тайгана Хомушкунуң удуртулгазы-биле өөреникчилер оңгу чырыткыланы кылганнар.
Алдыгы болгаш 1-4 класстарның өөреникчилери башкызының тайылбырын кичээнгейлиг дыңнап, акцияның сорулгазын улуг харыысалга-биле хүлээп алганнар. Оолдар, уруглар 17 лааны белеткээн. Оларның ачы-дузазы бо хүннерде фронтуга чедер болгаш дайынчыларга чылыгны сөңнээр.
Мастер-класстың киржикчилери оңгу чырыткыларның дугайында хөйнү билип алганнар. Ооң дузазы-биле чемни-даа кылып чиир, идик-хевин кургадыр, соокта чылнып-даа болур.
Идепкейлиг киржилгези дээш уругларга «Россияның бичии эзирлери» хөрек демдектерин болгаш спортчу хеп суггар сумкаларны тывыскан.
