Улуг-Хем кожууннуң Арыг-Үзүү ортумак школазынга Кежиктиг Тунгур-оолдуң чырык адынга тураскааткан «Маадырның партазын» ажытканын чагырга чери дыңнаткан.
Тускай шериг операциязының үезинде дайынчы албан-хүлээлгезин эрес-дидими-биле күүседип тургаш, амы-тынындан маадырлыы-биле чарылган Кежиктиг Тунгур-оолдуң чырык адын “Маадырның партазынга” мөңгежиткен.
Эрес-дидим, коргуш чок маадырның школачы үелери Арыг-Үзүү ортумак школазынга эрткен. Ол школага өөренип тургаш кызымак, хөй-ниитижи, хостуг хүрешке болгаш бут бөмбүүнге тергиин спортчу деп санадып чораан.
«Маадырның партазын» ооң өөренип чорааны клазынга тургузар болгаш ол хүндүткелдиг партага школаның тергиин эки өөредилгелиг дөрткү классчызы Чаян Чүлдүмге олурар эргени берген.
Дайынчыны «Эрес-дидим чоруу дээш» орден-биле мөчээн соонда шаңнаан. Ооң чырык адынга тураскааткан тураскаал самбыраны база ажыдып, дириг чечектерни салган.
Кежиктиг Тунгур-оолдуң чоок кижилери – авазы Урана Михайловна, өөнүң ишти Сайзана Семеновна, төрелдери, Кызылда 55-ки тускай мото-адыгжы (даг) бригададан дайынчы эштери, школаның удуртулгазы, чаңгысклассчылары дээш өске-даа аалчылар кээп, маадырның дугайында чылыг сактыышкыннарны кылган.
Улуг-Хем болгаш Чаа-Хөл кожууннарның шериг комиссариадының болгаш кожуун база суму чагырга чериниң төлээлери хемчегге киришкеннер.
Эрес-дидим, дайынчы даңгыраанга болгаш албан-хүлээлгезинге шынчызын көргүзүп, тайбың дээш амы-тынын харам чокка берген дайынчыларывыстың Маадырлыг чоруу төөгүге балалбас исти арттырып, оларның чырык ады кезээ мөңгеде сактыышкын болуп артар.
