Мөңгүн-Тайга кожууннуң спорт школазының Кызыл-Хая сумузунда салбырынга тускай шериг операциязының киржикчизи Оя Айызанның чырык адынга тураскааткан кожуун чергелиг тыва хүреш маргылдаазы болуп эрткенин чагырга чери дыңнаткан.
Россия Федерациязының болгаш Тыва Республиканың ыдык ырылары чаңгыланган соонда, маргылдааның эң улуг назылыг мөгези Родион Аралдии биле эң бичии мөге Алексей Тюлюш күрүне туктарын көдүрген.
Сумунуң удуртулгазы сөс ап, маадыр чаңгыс чер чуртуунуң дугайында чылыг сактыышкыннарны кылган.
Хүреш маргылдаазынга кожууннуң аңгы-аңгы булуңнарындан мөгелер киржип, ачыр-дачыр тудушкан.
Маргылдааның шылгараан дөрт шыырак мөгези: Радомир Куулар (Мугур-Аксы) шүүлген, Кызыл-Хаядан Айдың Баавыл үжүүрлешкен. Үшкү-дөрткү шаңналдыг черлерде Мугур-Аксындан Аяс Монгуш биле Кызыл-Хаядан Аганак Самбыр-оол.
Бештен сесче кирген мөгелер – Мугур-Аксындан Сылдыс Монгуш, Кызыл-Хаядан Эдик Иргит, Мугур-Аксындан Меңги Шомбул, Кызыл-Хаядан Балчий Чамзы.
Хүреш үезинде чараш оюнну көргүскен мөгелерге тускай шаңналдарны тывыскан. «Чараш арга» – Торулбас Серээ, «Чараш девиг» – Күдерек Борбай-оол.
Онзалап демдеглексеп каар чүүл – шүүлген мөге Радомир Куулар шаңналга алган молдургазын, шаңналдыг черлерже кирген мөгелер Аганак Самбыр-оол шаңналының ийи чүзүн малын, Меңги Шомбул шаңнал акшазын сумунуң хөй ажы-төлдүг өг-бүлелеринге дамчыткан.
