Тываның суд системазының 95 чыл оюнга тураскааткан байырлыг хуралга тускай шериг операцияга маадырлыы-биле чок болган Буян Комбунуң чырык адын сактып, РФ-тиң Суд департаментизиниң «Күш-ажылчы шылгарал дээш» деп медалын (мөчээн соонда) тывысканын департамент дыңнаткан.
ТР-ниң Дээди Судунуң даргазы Валерий Ондар маадырның авазы Рада Тулушовнага оглунуң суд системазын хөгжүдеринге болгаш судтарның ажыл-чорудулгазын хандырарынга киирген улуг үлүг-хуузу дээш шаңналын тывыскан.
Хөй ажы-төлдүг ада Буян Комбу Улуг-Хемниң район судунга ажыл-агый эргелекчилеп турган. Ол 2023 чылда дайынчы хөделиишкиннер девискээринче эки турачылап чорупкан. Маадыр бодунуң берген даңгыраанга төнчүзүнге чедир шынчы болуп, дайын шөлүнге шериг хүлээлгезин сыныш чок күүсеткеш, амы-тынындан чарылган. Б.Н. Комбунуң өөнүң ишти алды бичии оглу-биле арткан.
РФ-тиң Дээди Судунуң чанында Суд департаментизиниң чиңгине директору Владислав Иванов маадырның дөргүл-төрелинге болгаш чоок кижилеринге чагаазында: «Буян Николаевич ышкаш маадырларның ачызында бистер тайбың дээр адаанга чурттап, келир үеже бүрүрел-биле көрүп болур бис. Маадырның дугайында чырык сактыышкын бистиң чүректеривиске кезээ мөңгеде артар» – деп, ол демдеглээн.
Б.Н. Комбу-биле кады ажылдап турган эш-өөрү ооң дузааргаан, чазык аажы-чаңын сактып турган.
Тываның суд системазының беш ажылдакчызы тускай шериг операциязының киржикчилери. Шүүгү чериниң дыңнадып турары-биле алырга, оларның ийизи дайынчы хөделиишкиннер девискээринге маадырлыы-биле бажын салган.
#Дээдисуд #Суддепартаментизи #ТМГМедээлер #Тыва #Тывамедээ #Тывадыл #Тывамедиагрупп #Тува
