Тываның Чазаанга ТР-ниң Чазак Даргазының оралакчызы Шолбан Сендаштың башкарылгазы-биле Террорга удур комиссия биле оперативтиг штабтың каттышкан хуралы болуп эрткен.
Хуралга Частың болгаш күш-ажыл байырлалын база Улуг Тиилелгениң 81 чыл оюн республикага эрттирип турар үеде, хөй-ниитиниң айыыл чок чоруун хандырарының база эрге-чагырга черлери биле корум-чурум камгалаар органнарның аразында албан черлер аразында кады ажылдажылгазын организастаар айтырыгларны чугаалашкан. Одалга-энергетика комплекс объектилериниң, транспорт инфратургузуунуң, социал объектилерниң база хөй улус чыглыр черлериниң террорга удур камгалалынче онза кичээнгейни угландырган.
Тывада корум-чурум камгалаар органнарның, одалга-энергетика база орук-транспорт адырларының болгаш муниципалдыг тургузуглар удуртукчулары биле төлээлери массалыг хемчеглер үезинде хөй-ниитиниң айыыл чок чоруун хандырарынга беленин база айыыл-халапты болдурбазының талазы-биле алдынган хемчеглерни Чазак Даргазының оралакчызынга илеткээн.
Ниитилел-политиктиг байдалды божаңнадырынче угланган багай салдарлыг информация суртаалдарга, ол ышкаш аныяктарны интернет болгаш мессенджерлер таварыштыр хоойлуга удур ажыл-чорудулгаже хаара тудар оралдажыышкыннарга удур ажылдаарының айтырыгларын аңгы чугаалашкан.
Чайгы кадыкшылга кампаниязынга белеткел ажылдары-биле, уругларның дыштанылга болгаш кадыкшылга объектилериниң террорга удур айыыл чок чоруун бедидеринче угланган айтырыгларны база чугаалашкан. Илереттинген четпестерни чайладыр болгаш объектилерде айыыл чок чоруктуң паспорттарын бүгү негелделерге дүүштүр кылыр даалгаларны хуралда инфратургузуг болгаш социал организациялар удуртукчуларынга берген.
