Тываның көдээ ажыл-агыйында эң-не чымыштыг үе – мал оолдаашкыны кидин түлүк. Малчыннар малдың чаш төлүн онча-менди камгалап алыр дээш шудургу ажылдап турарлар.
Улуг-Хем кожууннуң Эъжимден Сергек Мижит-Доржунуң Калмыкиядан садып эккелген тевелери бо чылын оолдап эгелээнин чагырга чери дыңнаткан.
Март айның сөөлгү хонуктарында кончуг соок хат хадып турар хүннерде Мижит-Доржуларның дөрт эңгини төрээн, бодаганнары сергек. Оларның бажын тудуп тургаш эмзиртип албаска чаш бодаганнар бажын угбас, эмип шыдавас. Ынчангаш хостуг оъттап чоруур теве малдың төрүүр эңгиннерни кажаалап алгаш туда кадарып турарлар.
Сөөлгү каңдаашкынныг чылдарда оът-сиген чегей үнгенинден Сергек Мижит-Доржу тевелеринге сигенни, чарбаны соңгаартан садып ап турар. Мал дузун Дус-Дагдан садып, сөөртүп эккеп алган.
Кожууннуң мал эмчилери чылдың-на тевелерниң ханын хынап, аарыгларга удур камгалал тарылганы чорудуп турар. Эрткен күзүн элеовит витаминни салган.
