Тываның ажыл-агыйларында 164 муң ажыг баш бода база 670 муң хире баш шээр мал кышты эртип турар.
ТР-ниң Көдээ ажыл-агый болгаш аъш-чем яамызының база муниципалдыг көдээ ажыл-агый эргелелдериниң удуртукчуларындан болгаш тускай мергежилдиглеринден, мал болгаш кижи эмчилеринден, кожуун болгаш суму чагырга черлериниң социал политика талазы-биле ажылдакчыларындан, ол ышкаш Онза байдалдар яамызының ажылдакчылары болгаш полицияның участок төлээлеринден тургустунган албан черлер аразының бөлүктери мал кыштаглаашкынын хайгаарап, практиктиг дузаны чедирери-биле малчын аалдарже үнүүшкүннерни доктаамал чорудуп турар.
Кыштаглаашкын эгелээнден бээр албан черлер аразының бөлүктери Тожу, Чеди-Хөл, Өвүр, Бай-Тайга, Барыын-Хемчик, Чөөн-Хемчик, Чаа-Хөл, Кызыл кожууннарда 1400 хире малчын турглагны эргип кезээн. Хой-өшкү азырап өстүрүп турар хөй ажы-төлдүг малчыннарже, тускай шериг операциязының киржикчилериниң аалдарынче, тыва далган болгаш сүт продукциязын бүдүрер адырда чаа эгелеп чоруур хуу сайгарлыкчыларже кол кичээнгейни угландырган.
Малдың кыштаглаашкынын хүр эртери-биле республикада 222,9 муң тонна сиген-ширбиилди, 986 тонна мал чиир тарааны белеткээн. Январь эгезинге чедир 55,7 муң тонна мал чемин, азы курлавырның 25 хуузун ажыглаан.
Ветеринария албанының тускай мергежилдиглери республикада эпизоотиктиг байдал таарымчалыг деп үнелээн: малдың халдавырлыг аарыглары болгаш массалыы-биле өлүп-хораар чоруу бүрүткеттинмээн.
