Таңды кожууннуң Межегей сумузунуң ортумак школазының 8 «б» клазының өөреникчилери башкызы Тайгана Араптанның удуртулгазы-биле тус черниң аныяк малчыннарынга дузазын каткан.
Межегейден Тимур биле Буянмаа Монгуштарның беш ажы-төлдүг өг-бүлези "Кыштаг" төлевилелиниң 2016 чылдың киржикчилери. Аныяк малчыннарның кыштаа сумудан ырак эвесте.
Оолдар малчыннарның кажаа-хораазын коптарган. Өгнүң кыс ээзи уругларга хойнуң ишти-хырнын арыглап, изиг-хан кылырынга мастер-класстарны эрттирген. Шак ынчалдыр кыштагжыларның аалчылары ажылын доозупкаш, сүүзүннүг, суугуга хайындырып каан, сүттүг шайны аартап, национал тыва чемни чооглап, арыг агаарга мага хандыр дыштанганнар.
Апрель ай – малчыннарга мал оолдаашкынының кидин түлүктээр үези. Бо чымыштыг үеде ажыл-агыйжы кижи олут орбас, чыдын чытпас. Чай чок ажыл-ишке өй-шаанда дуза дээш, малчыннар эрес-кежээ эки турачыларга өөрүп четтиргенин илереткен.
