Бии-Хем кожуунда малчын турлагларже комплекстиг үнүүшкүннер эгелээн. Ажылчын бөлүк Аржаан,Тарлаг, Хадың сумуларының көдээ ишчилериниң аалдарынче чедип, малдың деңгелин, сиген-ширбиил курлавырын, харның кылынын, оруктарның байдалын хынап көрген.
Малчыннарның бажыңнарынга өрт медээчилерин тургускан. Ук херексел чүгле өрттү эвес, а өрээлде ыш тыптып келгенин база дыңнадыптар. Ол ышкаш угарлыг ыштан хоранналырының уржуктарын сагындырып, печканы шын ажыглаарының дугайында тайылбырны чоруткан.
Аржаанның фельдшер-акушер пунктузунуң эмчизи малчыннарны шинчилээн. Ном саңының ажылдакчызы номнар, солун-сеткүүлерни көдээ ишчилерге үлээн.
Кожуун чагыргазының чер болгаш өнчү-хөреңги эргелелиниң даргазы кыштагларның чер участоктарын тодаргайлап, чер үндүрүглериниң талазы-биле тайылбырлаан.
Көдээ ишчилер ужуражылга үезинде курорт-дыштанылга санаторийлеринче чиигелделиг путевкаларны тыпсыр, кадат шөлдерин улгаттырар дугайында дилеглерни киирген.
Чаңчыл езугаар Чаа чыл бүдүүзүнде малчыннарга байыр чедирип, уругларга чигирзиг белектерни сөңнээн.
Ажылчын бөлүкче кожууннуң көдээ ажыл-агый эргелелинин даргазы Лада Кужугет, административтиг комиссиязының, чер болгаш өнчү-хөреңги эргелелиниң, назы четпээннер талазы-биле комиссияның төлээлери, тус чер чагыргаларының удуртулгазы кирген.
Көдээ ишчилер мал кыштаглаашкынын чидириг чок эртер дээш сиген-ширбиилин чедер кылдыр белеткеп алганын хыналда көргүскен. Көдээ ажыл-агый эргелелиниң ажылдакчылары биле мал эмчилери мал-маганның байдалын доктаамал хынап турар.
