Күрүне болгаш муниципалдыг албан черлеринден аңгыда, массалыг информация чепсектери кылдыр бүрүткеттинген журналистер, солуннар, журналдар, телеканалдар, радиоканалдар редакциялары, интернет-парлалгаларның редакциялары база Тывада журналистика, массалыг информация чепсектери болгаш интернет төлевилелдер адырында ажылдап турар журналистер, хуу кижилер болгаш сайгарлыкчылар грант мөөрейинге киржип болур.
2025 чылда «Владимир Путин-биле чылдың түңнелдери» деп программаның дорт дамчыдылгазынга болгаш Тываның Баштыңының Дээди Хуралынга Айыткалында салган даалгалар, Россия биле Тывада Ада-чурт камгалакчызының база Улуг Тиилелгениң 80 чыл оюн эрттирери-биле холбаштыр, ол ышкаш тускай шериг операциязын болгаш аныяктарның патриотчу кижизидилгезин, бүгү-российжи хамааты чаңгыс демни быжыглаарын, националдар болгаш шажыннар аразында харылзаалар, экстремисчи чорукту болдурбазы-биле холбашкан өске-даа күрүне даалгаларын деткээн медиа болгаш массалыг коммуникация адырында төлевилелдерни боттандырарының темаларын ажылдап кылган.
Мөөрейниң киржикчилери дараазында темаларга грантыны чаалап алыр дээш төлевилелдерин киирип болур:
- 1941-1945 чылдарда Ада-чурттуң Улуг дайынынга Тиилелгениң 80 чыл оюнга, Тиилелгени чедип алырынга Тыва Республиканың чурттакчыларының киирген үлүг-хуузунга, республикадан кыйгырткан азы ооң девискээринде чурттап чораан Ада-чурттуң Улуг дайынының киржикчилериниң дугайында медээлерни чыып база парлаан эң эки медиа төлевилел;
- хамаатыларны, ооң иштинде аныяктарны, патриотчу кижизидилгеже, төөгүнүң алыс шынын камгалаарынче болгаш төөгүлүг сактыышкынны кадагалап арттырарынче, Россияның чоннарының үндезин сүлде-сүзүк болгаш мөзү-шынар үнелиг чүүлдериниң ролюн кадагалап, угаан-медерелинге ханы быжыглаарынче, тускай шериг операциязының киржикчилериниң ажыл-херээн алдаржыдарынче угланган эң эки медиа төлевилел;
- бүгү Россияда хамааты чаңгыс демни быжыглаарынче, националдар болгаш шажыннар аразында харылзааларны эптештиреринче, экстремизмни болдурбазынче угланган эң эки медиа төлевилел;
- ажылчын мергежилдерни нептередиринче угланган эң эки медиа төлевилел.
Тываның Баштыңының массалыг информация чепсектери болгаш массалыг коммуникациялар адырында грантызын алырының негелделериниң аразында Тыва дугайында материалдар 75 хуу турар ужурлуун айыткан. Оон аңгыда билдириишкин киирикчилери Роскомхайгааралдан массалыг информация чепсектер хоойлужудулгазын хажытпаан дугайында дыңнадыгны албан киирер.
Дүрүмнүң негелделери-биле, кордакчылар республика бюджединден ол чылда өске хевирниң деткимчезин албаан турар ужурлуг.
Төлевилел бүрүзүн боттандырарынга 400 муң рубль чедир грант акша-хөреңгизин бээр. Мөөрейге киржир чогуур бөлүк документилерни 2025 чылдың апрель 17-ге чедир дараазында адресте ТР-ниң Баштыңының Администрациязы болгаш ТР-ниң Чазааның Аппарадының Информация поликазының департаментизинге хүлээр: 667000, Тыва Республика, Кызыл хоорай, Чульдум кудумчузу, б. 18, каб. 100/1, тел. 8(39422)9-73-07, электроннуг хевирде долдурган чагыгны бо электроннуг адресче чорудар: departamenti@list.ru . Департаментиден харыысалгалыг специалист – Монгуш Орлана Лавкиновна.
rtyva.ru/ сайтыда "Иные документы" кезекте мөөрейге киржирде херек бөлүк документилерниң даңзызын, Мөөрейниң дүрүмүн, доктааттынган майыкта долдурар билдириишкинниң хевирин чара парлап ап болур.
Журналистер Луиза Первушина медиа база блог адырынга корум-чурум үрээшкиннеринге, орук-транспорт болуушкуннарынга удур айыыл чок чорукту суртаалдаан профилактика ажылдыг «Тува – территория безОпасности» төлевилели-биле, Мерген Ондар Россияның Президентизиниң чарлааны Өг-бүле чылынга тураскаадып, өг-бүле камгалалы, ооң үнелиг чүүлдерин кадагалап база быжыглаар адырда күрүне политиказын суртаалдаан «Мээң өг-бүлем – мээң чөлеңгиижим» деп төлевилели-биле, Альмира Сенди амыдыралдың кадык овур-хевирин, социал чедишкиннерин, социал-мөзү-бүдүш аажы-чаңын, сагыш-сеткил, мага-бот кадыкшылын суртаалдаан «Кадыкшылды камнаалы» төлевилели-биле, Чейнеш Дапык тускай шериг операциязының киржикчилерин, оларның маадырлыг чоруктарын мөңгежидер, ТШО киржикчилерин болгаш оларның өг-бүлелерин деткээн хемчеглерни чырыдар «Маадырлар» деп төлевилели-биле Тываның Баштыңының массалыг информация чепсектериниң адырында грантылар мөөрейинге эрткен чылын тиилээннер.
